Փաստաբանությունը բավականին քիչ լծակներ ունի՝ ազդելու ստեղծված իրավիճակի վրա կամ բողոքի ձայն բարձրացնելու, և գործադուլն այն ծայրահեղ միջոցն է, որով փորձ է արվում ուշադրություն կենտրոնացնել ոլորտի խնդիրների վրա։ Azg.am-ի թղթակցի հետ զրույցում նման տեսակետ հայտնեց փաստաբան Երվանդ Վարոսյանը՝ անդրադառնալով Հայաստանի ողջ տարածքում փաստաբանների հայտարարծ գործադուլին։
Հիշեցնենք՝ փաստաբանները հրաժարվում են մասնակցել պետական մարմիններում՝ դատարաններում, նախաքննական մարմիններում պաշտպանություն կամ ներկայացուցչություն իրականացնելուց։ Նրանք կառավարությունից պահանջում են հանդես գալ օրենսդրական նախաձեռնությամբ և «Հայաստանի Հանրապետության հարկային օրենսգրքում լրացումներ կատարելու մասին» օրենքի նախագիծը ՀՀ ազգային ժողով ուղարկելու միջոցով՝ փաստաբանական գործունեություն համարվող ծառայությունների մատուցումը, անվճար (անհատույց) և կամավոր անհատույց իրավաբանական օգնության տրամադրումը ազատել ավելացված արժեքի հարկից:
Երվանդ Վարոսյանը դժվարացավ կանխատեսել, թե ՀՀ գործող իշխանությունների պարագայում փաստաբանական հանրույթի բողոքի գործողությունն ինչքանով արդյունավետ կլինի։
«Որովհետև չեմ կարծում, թե իրենք գլոբալ առումով գիտակցում են, թե ինչ են անում։ Մի բան ակնհայտ է՝ ՀՀ գործող իշխանությունները փողի կարիք ունեն, բայց չունեն փողի աղբյուրներ, որովհետև, որպես իշխանություն, այդքան շնորհք չունեն՝ զարգացնելու տնտեսությունը և ունենալու համապատասխան ֆինանսներ։ Այդ է պատճառը, որ գնում են հարկային խստացումների։
Ինչ վերաբերում է կոնկրետ փաստաբանության ոլորտի խստացումներին, ՀՀ իշխանությունները բացարձակապես չեն պատկերացնում՝ ինչ է փաստաբանությունը, ինչ նշանակություն ունի այս ինստիտուտը։ Իրենք չգիտեն, որ փաստաբանությունն առաջին հերթին իրավապաշտպան գործունեություն է, և հասարակության անդամների իրավունքների պաշտպանությունը կախված է փաստաբանությունից։
Դիտարկել փաստաբանությունը զուտ որպես ձեռնարկատիրական գործունեություն ծայրահեղ սխալ է»,- ասաց Երվանդ Վարոսյանը։
Ըստ մեր զրուցակցի՝ ՀՀ իշխանությունները սեփական քաղաքացուն զրկում են անգամ անվճար իրավաբանական ծառայություններից, խորհրդատվություն ստանալու իրավունքից։
«Սա հղի է լուրջ հետևանքներով և առաջին հերթին հարվածելու է քաղաքացիներին, որովհետև փաստաբաններն ստիպված են լինելու դրա դիմաց էլ վարձատրություն պահանջել. անկախ այն բանից՝ նա գործողությունն անվճար կանի, թե ոչ, պետությունը ցանկանում է հարկել նրան։ Սա տեղավորվում է ՀՀ իշխանությունների ընդհանուր քաղաքականության մեջ. ինչպես բոլոր ոլորտներն են տանում տապալման, այս ոլորտը ևս հերթականն է, որ փորձում են տապալել։ Ինքս այսօր մասնակցում եմ փաստաբանների հայտարարած գործադուլին, դատական նիստերի չեմ ներկայացել և չեմ ներկայանալու, բայց ասել, որ հույս ունեմ, թե այս իշխանությունը կհասկանա՝ ինչ է անում, ցավոք այդ լավատեսությունը չունեմ»,- ամփոփեց Երվանդ Վարոսյանը։
