ԱԺ «Պատիվ ունեմ» խմբակցության պատգամավոր Աննա Մկրտչյանը հարցազրույց է տալիս և ասում, որ իրենք վարչապետի թեկնածու չունեն։ Զարմանալի բան է. կուսակցությունը դիրքավորվում է որպես ամենաազդեցիկ կուսակցություններից մեկը՝ ՀՀԿ, և այդ կուսակցության գործադիր մարմնի անդամն ասում է, որ վարչապետի թեկնածու չունեն։ Ուղիղ եթերում այս մասին այսօր ասաց Լեհաստանում ՀՀ նախկին դեսպան Էդգար Ղազարյանը՝ անդրադառնալով Նիկոլ Փաշինյանին անվստահություն հայտնելու գործընթացին։
«Ասենք՝ մեռավ։ Այ մարդ, հեծանիվ քշելուց աչքը կպնում ա, գնում ա, գլուխը խփում ա պատին, մեռավ։ ՀՀԿ-ն վարչապետի թեկնածու չունի՞, ըտենց բան ո՞նց կլինի։ Դուք ցանկացած իրավիճակի համար պետք է վարչապետի թեկնածու ունենաք»,- ասաց նա։
Անդրադառնալով ՔՊ-ական պատգամավոր Արսեն Թորոսյանի՝ Փաշինյանին անվստահություն հայտնելու վերաբերյալ նամակն ուղիղ եթերում պատռելու արարքին՝ Էդգար Ղազարյանը նշեց՝ նա դա արեց՝ անգամ առնաց նամակը կարդալու։
Լեհաստանում ՀՀ նախկին դեսպանը շեշտեց՝ ինքը գրանցվել է առաջիկա օրերին պատգամավորներ Ռուբեն Ռուբինյանի, Հակոբ Արշակյանի և բոլոր հանձնաժողովներ նախագահների կողմից քաղաքացիների ընդունելությանը։
«Ուզում եմ իրենց դիրքորոշումներն իմանամ վարչապետին անվստահություն հայտնելու վերաբերյալ։ Ես, պատգամավոր չլինելով, եթե ջանքեր եմ գործադրում այդ մարդկանց հետ հանդիպելու, նրանց կարծիքը հանրությանը հայտնելու, ձե՞ր գործն ինչն է»,- ԱԺ պատգամավորներին հարց ուղղեց նախկին դեսպանը՝ նշելով, որ ի տարբերություն իրենց՝ անվստահություն հայտնելու նախաձեռնությունն անլուրջ համարող ընդդիմադիր խմբակցություններն առհասարակ ոչինչ չեն անում։
Էդգար Ղազարյանը շեշտեց՝ անվստահության նախաձեռնությամբ իրենք որևէ խմբակցության թիրախավորելու միտք չունեն, միակ նպատակը Նիկոլ Փաշինյանին իշխանությունից հեռացնելն է։
Վերջում նա տեղեկացրեց, որ գործընթացի շրջանակներում հանդիպումներ են նախատեսվում մի շարք խորհրդարանական և արտախորհրդարանակլան քաղաքական ուժերի ներկայացուցիչների հետ, և որքան էլ որոշ մարդիկ անվստահություն հայտնելու նախաձեռնությունը և անձամբ իրեն «անլուրջ, ծաղրածու կամ կապիկություն» են որակում, միևնույն է, այն բերելու է հաղթական արդյունքի։
«Ես վստահ եմ, որ ժողովուրդը ոտքի է կանգնելու, և Նիկոլ Փաշինյանը վռնդվելու է մինչև 2026 թվականի ընտրություններ՝ անվստահություն հայտնելու միջոցով»,- ասաց Էդգար Ղազարյանը։
