2021-ի մայիսին Վրաստանի վարչապետ Իրակլի Ղարիբաշվիլին Հայաստանում էր, եւ որքան էր զարմանալի է (ինչու ոչ՝ տարօրինակ), նրա՝ մեկօրյա այցի օրակարգում ներառված էր նաեւ Բյուրականի աստղադիտարանը։ Վիկտոր Համբարձումյանի անվան աստղադիտարանի տնօրեն, ֆիզիկամաթեմատիկական գիտությունների թեկնածու Արեգ Միքայելյանը լրագրողների հետ՝ օրերս ունեցած հանդիպման ժամանակ բավական ուշագրավ մի դրվագ պատմեց Վրաստանի վարչապետի՝ գիտական կենտրոն այցից․«Ղարիբաշվիլին աստղադիտակով տեսավ երեկոյան երկինքն ու գովեստի խոսքեր ասաց մեր գիտությանը։
Ես էլ անկեղծորեն հարցրեցի․ «Պարո՛ն վարչապետ, Ձեզ հայտնի է, չէ՞, որ Վրաստանում էլ աստղադիտարան կա»։ Նա, մի քանի վայրկյան ինձ հարցական եւ սառած հայացքով նայելուց հետո, գլխով դրական պատասխան տվեց։ Բայց ակնհայտ էր, որ հարցից անակնկալի էր եկել»։
Միքայելյանը հստակ կամ միանշանակորեն չի ուզում պնդել՝ Վրաստանի վարչապետը գիտե՞ր արդյոք «Աբասթումանի»-ի աստղադիտարանի մասին, բայց վկայակոչում է մեկ այլ ուշագրավ հանգամանքի․ «Այդ հանդիպում-միջադեպից ուղիղ երկու ամիս անց «МИР» հեռուստաընկերության ռեպորտաժն աչքովս ընկավ, որ պատմում էր Վրաստանի վարչապետի եւ կառավարության մյուս անդամների՝ «Աբասթումանի»-ի աստղադիտարան այցի մասին։ Ավելին՝ այցի ժամանակ Ղարիբաշվլին որոշել էր՝ պետբյուջեից հավելյալ 10 մլն դոլար հատկացնել գիտական կենտրոնին։ Փաստորեն, ինձ հաջողվեց «միջնորդել» վրացական գիտության համար, բայց մեզ համար հավելյալ ֆինանսավորում ձեռք բերել չի ստացվում (կատակելով ժպտում է- Ս․Վ․)»։
Սեւակ Վարդումյան
