ԱՄՆ նախագահ Դոնալդ Թրամփը հայտարարել է, որ Ղրիմը Ուկրաինային վերադարձնելն անհնար է։
Նա նաև համոզմունք է հայտնել, որ Ուկրաինան չի դառնա ՆԱՏՕ-ի մաս։
«Նրանք ՆԱՏՕ-ի մաս չեն կազմի», – ասել է նա Fox News-ին տված հարցազրույցում՝ մեկնաբանելով Կիևի՝ դաշինքին միանալու հեռանկարը։
Ամերիկյան առաջնորդի խոսքով՝ «այս երկու բանն էլ անհնար են»։
ԱՄՆ նախագահի տեսանկյունից՝ Ուկրաինան չպետք է հզոր Ռուսաստանին դեմ դուրս գար։
«Սա պատերազմ է, և Ռուսաստանը հզոր ռազմական տերություն է։ Գիտեք՝ անկախ նրանից՝ մարդկանց դա դուր է գալիս, թե ոչ՝ հզոր տերություն է, մեծ տերություն։ Սա այն պատերազմը չէ, որը պետք է սկսվեր։ Այդպես չեն անում, պատերազմի մեջ չեն մտնում այն երկրի հետ, որը տասն անգամ մեծ է քոնից», – ասել է Թրամփը։
Հիմա, ըստ ԱՄՆ նախագահի, Վլադիմիր Զելենսկին պետք է բանակցային գործընթացում ճկունություն ցուցաբերի։
«Հուսով եմ՝ Զելենսկին կանի այն, ինչ պետք է անի։ Նա պետք է որոշակի ճկունություն ցուցաբերի… Երկիրը մասնատվում է», – ասել է Թրամփը։
Մեկնաբանելով եվրոպացի առաջնորդների հետ բանակցությունները՝ Թրամփն ասել է, որ Սպիտակ տանը կայացած հանդիպմանը նրանք ըմբռնում են ցուցաբերել Ուկրաինայի կողմից տարածքային զիջումների անհրաժեշտությանը։
«Նրանք հասկացել են», – ասել է ԱՄՆ նախագահը՝ պատասխանելով Կիևի կողմից տարածքային զիջումների անհրաժեշտության վերաբերյալ հանդիպման մասնակիցների վերաբերմունքի մասին հարցին։
