ԱՄՆ նախագահ Դոնալդ Թրամփը կարգադրել է ժամանակավորապես դադարեցնել Ուկրաինային տրամադրվող ռազմական օգնությունը, մինչև Կիևը չապացուցի իր «հավատարմությունը խաղաղությանը». գրում են միջազգային մի շարք հեղինակավոր լրատվամիջոցներ՝ Reuters-ը, APnews-ը, BBC-ն, The Guardian-ը և այլն։
Սա տեղի է ունեցել այն բանից հետո, երբ Թրամփը Սպիտակ տան Օվալաձև աշխատասենյակում վիճաբանել է Ուկրաինայի նախագահ Վլադիմիր Զելենսկու հետ։
«Նախագահ Թրամփը հստակ նշել է, որ նա կենտրոնացած է խաղաղության վրա։ Մեզ անհրաժեշտ է, որ մեր գործընկերներն էլ հավատարմություն ցուցաբերեն այդ նպատակին։ Մենք կասեցնում և վերանայում ենք մեր օգնությունը, որպեսզի համոզվենք, որ այն նպաստում է խնդրի լուծմանը», — հայտարարել է Սպիտակ տան պաշտոնյան, որի խոսքերը մեջբերում են տարբեր հեղինակավոր լրատվամիջոցներ։
Ինքը՝ Թրամփը, դեռևս չի մեկնաբանել այս որոշումը։ Սպիտակ տանից ևս պաշտոնական հաղորդագրություն դեռ չեն տարածել։
Երկուշաբթի օրը լրագրողների այն հարցին, թե արդյոք նախատեսում է կասեցնել ռազմական օգնությունը Ուկրաինային, Թրամփը պատասխանել է. «Կտեսնենք՝ ինչ կլինի հետո»։
