Իրանական «Շահրվանդ» օրաթերթն անդրադառնալով հայկական ու ադրբեջանական ուժերի վերջին բախմանը, գրել է․ «Սահմանային նոր բախումները տեղի են ունեցել Լեռնային Ղարաբաղն Ադրբեջանի վերահսկողության տակ անցնելուց 5 ամիս անց»։
Երեքշաբթի օրը տեղի ունեցած բախման հետևանքով, ադրբեջանական կողմն ունի մեկ վիրավոր, հայկական կողմը՝ երեք զոհ և վիրավոր։
Որոշ վերլուծաբաններ կարծում են, որ այս բախումն Ալիևի կառավարության ծրագիրն է՝ Իրան-Հայաստան ճանապարհի կառուցումը խոչընդոտելու նպատակով։
Տարիներ շարունակ ընդգծվում է Իրանի ու Հայաստանի դերը Հյուսիս-Հարավ միջանցքում, որը Ռուսաստանը կապում է Հնդկաստանին։ Մոտ 3 ամիս առաջ, այդ հարցին անդրադարձ էր եղել Ռուսաստանի փոխվարչապետի հետ ՀՀ վարչապետ Նիկոլ Փաշինյանի հանդիպման ժամանակ։
Caucasus Studies Channel-ը բախման կապակցությամբ գրել է․ «Բախումները սկսվեցին Իրան-Հայաստան ճանապարհի շինարարության մեկնարկից հետո։
Հյուսիս-հարավ ճանապարհային միջանցքի Տրանշ-4-ի Քաջարան-Ագարակ (Իրանի սահման) 32կմ ճանապարհահատվածի վերակառուցման մեկնարկը տրվել է։ Կապալառու կազմակերպությունը այժմ իրականացնում է մոբիլիզացիոն-նախապատրաստական աշխատանքներ, կառուցվում է շինարարի բազան‚ ներմուծվում է շինտեխնիկա։ Այս ճանապարհը կդիվերսիֆիկացնի Հյուսիս-Հարավ տարանցումը և կզսպի Աստարա-Բաքու երթուղու վրա Բաքու-Թուրքիա առանցքի ճնշումը:
Լազուլիի ճնապարահի և Բաքու-Թբիլիսի-Ջեյհան խողովակաշարի կապակցությամբ Թուրքիայի ծրագիրը լուրջ սպառնալիքի տակ կդնի Իրանի դերը միջազգային առևտրում»։
Տպավորություն է ստեղծվում, որ Բաքվի ու Երևանի միջև վերջին բախումը ծրագրվել է Թուրքիայում՝ Հյուսիս-Հարավ միջանցքը կտրելու և այսպես կոչված Զանգեզուրի միջանցքի ծրագրի գործադրմամբ Իրանի մուտքը Հայաստան և Եվրոպա կտրելու նպատակով։
