«Զվարթնոց» օդանավակայանից ռուս սահմանապահներին դուրս բերելու վերաբերյալ քննարկումներին չեմ մասնակցել, բայց կարծում եմ՝ ճիշտ կլինի, որ իրենք այնտեղից դուրս գան։ Ես վստահ չեմ, որ իրենք մեր երկրի սահմանները կպաշտպանեն, դուք վստա՞հ եք, մի քանի անգամ ապացուցվել է, որ չպաշտպանեցին, ամեն ինչ արեցին, որ սահմանները շատ ավելի խոցելի լինեն։ Եկան Ղարաբաղ՝ ի՞նչ արեցին։ Եկան Ղարաբաղ և հայ ժողովրդին դուրս ուղեկցեցին»,-ԱԺ-ում լրագրողների հետ ճեպազորւյցում ասաց ԱԺ նախագահ Ալեն Սիմոնյանը։
Նրա պնդմամբ՝ Հայաստանը կպաշտպանի իր երկրի սահմանները։
«Բոլոր երկրներն էլ պետք է իրար հետ խաղաղ ապրեն, և ես դեմ չեմ Ադրբեջանի և Թուրքիայի հետ խաղաղ ապրելուն։ Եթե որևիցե մեկն այլ տարբերակ կառաջարկի, ես պատրաստ չեմ նույնիսկ լսել»,- Ադրբեջանի հետ խաղաղ ապրելու հեռանկարի մասին ասաց Սիմոնյանը։
Հայաստանի ու Ադրբեջանի միջև հարաբերությունների կարգավորման գործընթացում առաջընթաց կա. հայտարարեց ԱԺ խոսնակը։
«Կան հարցեր, որոնց շուրջ համաձայնությունը եղել է նաև երրորդ երկրների մասնակցությամբ։ Շատ հարցերում էլ հետընթաց կա»,- ասաց Սիմոնյանը։
Գերիների մասով շարունակվում են բանակցությունները:
«Այս պահի դրությամբ եթե հաշվենք, Արցախի նախկին ղեկավարների հետ մոտավորապես 25 հաստատված գերի կա, և նրանց հետ կապված բանակցությունները շարունակվում են. տեղեկացրեց նա։
