Գործող իշխանության կողմից Հայ Առաքելական եկեղեցու վրա հարձակումներն իմ համար անհասկանալի են, այսօր հրավիրված ասուլիսի ժամանակ հայտարարեց ՀՀ երկրորդ նախագահ Ռոբերտ Քոչարյանը։
Քոչարյանի խոսքով՝ եկեղեցին չի խանգարում իշխանությանը աղքատության շեմը իջեցնել մինչև պատմական նվազագույնին։ Այն չի միջամտում տնտեսական քաղաքականության ձևավորմանը, հանցագործությունների բացահայտմանը և այլն։
«Ուստի ես էլ ռացիոնալ բացատրություն չունեմ»,– ասաց Քոչարյանը։
Նա միաժամանակ նկատեց՝ ինքն ակնկալում էր, որ հարձակումներ կլինեն եկեղեցու և առանձին եկեղեցականների վրա, և Հայ Առաքելական եկեղեցու որոշ սպասավորների նկատմամբ հարուցված քրեական գործերն իր համար նորություն կամ հայտնություն չեն եղել, քանի որ ինքն ակնկալում էր իրադարձությունների նման զարգացում։
«Եկեղեցու վրա հարձակումները, միանշանակ, ռեյտինգ չեն բերում ո՛չ վարչապետ Նիկոլ Փաշինյանին, ո՛չ էլ «Քաղաքացիական պայմանագիր» խմբակցությանը։ Եկեղեցու սպասավորներին բանտերում պահելը միանշանակ չի բարձրացնում նրանց ռեյտինգը։ Բայց նա ցանկանում է, որ Կաթողիկոսի տեղում հայտնվի մեկը, ով վերջապես կսկսի ենթարկվել իրեն»,– ամփոփեց Քոչարյանը։
