«Եվրախորհրդի վերաբերյալ Ադրբեջանի նախագահ Իլհամ Ալիևի հայտարարությունները հաստատում են Վեհաժողովում ադրբեջանական պատվիրակությանը լիազորություններից զրկելու արդարացիությունը»,- հայտարարել է Եվրոպայի խորհրդի խորհրդարանական վեհաժողովի (ԵԽԽՎ) նախագահ Թեոդորոս Ռուսոպուլոսը՝ պատասխանելով Alpha News-ի հարցին։
«Երկու օր առաջ Ալիևը ամենացինիկ ձևով ասաց, որ թքած ունի Եվրախորհրդի վրա, և որ կարծում է, որ մենք նրա կարիքն ավելի շատ ունենք, քան ինքը՝ մերը, որ աշխարհը փոխվել է։ Նա կեղծ լուրեր տարածեց՝ հայտարարելով, որ Եվրոպայի խորհուրդը որոշել է վիճարկել ադրբեջանական պատվիրակության լիազորությունները Լեռնային Ղարաբաղի և կռվի պատճառով, որում հաղթել է իր երկիրը։
Սա բացարձակ կեղծիք է, քանի որ մենք խնդրել էինք Ադրբեջանի իշխանություններին առաջին հերթին թույլտվություն տալ, որպեսզի մեր զեկուցողները մեկնեն Լաչինի միջանցք՝ Լեռնային Ղարաբաղ։ Հետո մենք անընդհատ թույլտվություն էինք խնդրում, որպեսզի մեր դիտորդները դիտարկեն երկրում ընտրությունները։ Մենք նաև թույլտվություն խնդրեցինք, որպեսզի զեկուցողները այցելեն Ալիևի քաղաքական հակառակորդներին, որոնք բանտում են։
Ալիևը, ինչպես գիտեք, սովորություն ունի իր քաղաքական հակառակորդներին բանտարկել։ Եվ նրանք երբեք չէին պատասխանում մեր կոչերին, նրանք միշտ մերժում էին մեզ։ Եվ այսպես, օրենքի գերակայությունը, մարդու իրավունքները հարգելուց երկու տարի հրաժարվելուց հետո, թեև դա շարունակվում է շատ ավելի երկար, հրաժարվելով հարգել Եվրախորհրդի պահանջները, վեհաժողովը արդարացիորեն որոշեց չվավերացնել ադրբեջանական պատվիրակության լիազորությունները։
Քանի որ Ալիևը հայտարարել է, որ թքած ունի Եվրոպայի խորհրդի վրա, սա նրա կարծիքն է։ Ես չեմ պատրաստվում մեկնաբանել դա: Ես պատրաստվում եմ այս հարցը բարձրացնել հաջորդ չորեքշաբթի դեսպանների, գլխավոր նախարարի առաջ, ինչպես արել եմ նախկինում։ Ես մեծ ջանքեր եմ գործադրել ադրբեջանցիներին հետ բերելու համար, խոսել եմ օրենքի գերակայությունը հարգելու, ժողովրդավարական ընթացակարգերի և մարդու իրավունքների պաշտպանության մասին։ Նրանք դա չարեցին։
Սկզբում պատասխանեցին, որ միջոցներ են ձեռնարկելու, ինչը մենք այդպես էլ չտեսանք։ Նրանք ազատ են արձակել մեկ կալանավորի, իսկ հետո կալանավորել են ուրիշների։ Այնպես որ Վեհաժողովը կատարել է իր աշխատանքը: Եվ միանգամայն պարզ է, որ Վեհաժողովն արդարացիորեն չի վավերացրել պատվիրակության լիազորությունները, և դա այսօր հաստատվում է Ալիևի այս հայտարարություններով։ Մենք չենք ափսոսում և կարծում ենք, որ ճիշտ ենք վարվել»,- նշել է նա։
Խոսելով Մարդու իրավունքների եվրոպական դատարանի որոշումները կատարելուց Ալիևի վերջնագրի տոնով մերժման մասին՝ Ռուսոպոլոսը նշել է. «Ոչ ոք չի կարող շանտաժի ենթարկել ԵԽ-ին։ Եվրոպայի խորհուրդը չի վախենում այդպիսի հայտարարություններից, քանի որ Եվրոպայի Խորհուրդը իր Վեհաժողովում ընդունել և ընդունում է որոշումներ, որոնք համապատասխանում են իրավունքի գերակայությանը, մարդու իրավունքներին և ժողովրդավարական ընթացակարգերին։ Հունվարյան նստաշրջանից հետո ես դիմեցի նախարարներին, Նախարարների կոմիտեին, ես հատկապես հիշատակեցի Վրաստանը՝ ասելով, որ սա ակումբ չէ, որտեղ ընդունելի է ընտրովի մոտեցումը, քանի որ վաղը, և դա հենց այն է, ինչ ես ասել եմ դեսպաններին, կարող ենք ունենալ որոշ պետություններ, որոնք կհրաժարվեն Մարդու իրավունքների դատարանից։
Երեք ամիս էլ չէր անցել, որ Ալիևը հաստատեց իմ մտավախությունները։ «Վախ» բառը փակագծերում դրեք, քանի որ մենք ոչնչից չենք վախենում, չենք վախենում Ալիևից կամ որևէ մեկից, որն իրեն բռնապետի պես է պահում։ Այնպես որ, հիմա սա մի հարց է, որը ես հույս ունեմ, որ Նախարարների կոմիտեն պետք է որոշի: Վեհաժողովի դիրքորոշումը շատ հստակ է՝ մենք որոշել ենք, որ մեր անդամ երկրներից ոչ մեկը չի կարող ասել՝ ես չեմ հարգում կանոնները, ես կհրաժարվեմ այդ մարմնից, այդ ինստիտուցիոնալ մարմնից կամ այլ ինստիտուցիոնալ մարմնից»։
