Նիկոլ-Ալիև թշնամական զույգը Հայաստանի համար ընտրել է շատ կոնկրետ բանաձև. Ալիևը սպառնում է հայ ժողովրդին, ՀՀ պետականությանը, նրա հետևից՝ Նիկոլը, և այդ սպառնալիքները նրանք մեկ անգամ չէ, որ իրագործել են, լրագրողների հետ զրույցում ասաց ԱԺ պատգամավոր Աննա Մկրտչյանը։
«2018 թվականից Նիկոլն ու Ալիևն, այդ սպառնալիքները համադրելով, զսպում են հայ ժողովրդի արդար ցասումը, ինքնության պահպանության և պետականություն ունենալու ցանկացած հնարավոր քայլ։
Երկու սրբազանների՝ կալանքի տակ գտնվելը, կին քաղբանտարկյալ Լիդիայի՝ կալանքի տակ գտնվելը, Սամվել Կարապետյանի՝ կալանքի տակ մնալը… Նիկոլը բանաձև է գտել՝ հայ ժողովրդին հալածել, բանտարկել, որովհետև այլընտրանքային մեթոդներ չկան»,- ասաց պատգամավորը։
Անդրադառնալով իշխանությունների գովերգած խաղաղության փաստաթղթին՝ Աննա Մկրտչյանը փաստեց՝ եթե խոսքն իրական խաղաղության մասին լիներ, Փաշինյանը փողոցներում խորոված-փարթիներ կկազմակերպեր, «դուխով» գրությամբ վերնաշապիկ կհագներ։
«Ինքը շատ լավ գիտի, որ դա խաղաղության մասին չէ։ Ալիևը երեկ ասեց, որ դա բացառապես իրենց շահերով պայմանավորված փաստաթուղթ է, որ Ադրբեջանը միշտ պետք է պատերազմի պատրաստ լինի՝ մեզ անվանելով թշնամական պետություն։ Էլ չեմ ասում, որ սահմանի ողջ երկայնքով զորքերի տեղաշարժ կա։ Այս տե՞սքն է պատկերացնում Նիկոլը»,- հարց հնչեցրեց Մկրտչյանը` հավելելով, որ հայ ժողովուրդը պետք է գիտակցի՝ Փաշինյանի հեռացմամբ տասնյակ ռիսկեր են չեզոքացվելու։
