Խնդրում եմ՝ այլևս չփորձեք մեկնաբանել այնպես, որ տեղահանված մեր քույրերի և եղբայրների նկատմամբ որևէ ձևով կարող է ատելություն գեներացվել իշխանության կողմից։ Լրագրողների հետ ճեպազրույցում այսօր այս մասին նշեց ՀՀ արդարադատության նախարար Սրբուհի Գալյանը՝ անդրադառնալով երեկ մետրոյում Նիկոլ Փաշինյանի՝ արցախցի Արմինե Մոսիյանի վրա մատ թափ տալու և արցախցիներին «փախածներ» կոչելու միջադեպին։
«Նախորդ շաբաթ ներառականության մասով մեծ միջոցառում ունեցանք, որը նվիրված էր տեղահանված մեր քույրերի և եղբայրների պաշտպանությանը։ Այնտեղ շատ մարդիկ կային, որոնք հաստատվել են Հայաստանում և օգտվում են սոցիալական ծրագրերից։ Այդ ամենում ես ոչ թե ատելություն նկատեցի իշխանության կողմից կամ, առհասարակ, վարած քաղաքականությունից, այլ ընդհակառակը՝ հոգատարություն, մեծ խնամք ու մեծ պատրաստակամություն աջակցելու»,- ասաց նա։
Միաժամանակ Սրբուհի Գալյանը չցանկացավ որակումներ տալ՝ Փաշինյանի երեկվա արարքում Արցախից տեղահանված կնոջ և երեխայի իրավունքների խախտում կա՞ր, թե ոչ։
«Ես դրա իրավունքն էլ չունեմ, բայց եթե չեմ սխալվում, հաջորդիվ վարչապետը հրապարակում է արել այդ միջադեպի հետ կապված, և կարող եք, օրինակ, մեջբերել վարչապետի հրապարակումը»։
Լրագրողների ճշգրտող հարցին՝ ինքն ի՞նչ կաներ, եթե այդ միջադեպից հետո վարչապետը ներողություն խնդրեր, ինչպես խնդրել է այդ կնոջից, արդյոք կներեր, Գալյանը պատասխանեց․
«Ես կմտածեի՝ ինչ անել և նույնն էլ խորհուրդ եմ տալիս այդ կնոջը։ Ես չեմ կարող որևէ որակում տալ այն երևույթին, որը տեղի է ունեցել, և գնահատականը միջադեպին տվել է հենց վարչապետը։ Ավելին որևէ բան չեմ կարող ասել»։
Անդրադառնալով Նիկոլ Փաշինյանի այն հայտարարությանը, որ եթե ՔՊ-ն ընտրությունների արդյունքում սահմանադրական մեծամասնություն չկազմի, սեպտեմբերին պատերազմ կլինի, Գալյանն ասաց՝ դա քաղաքական հայտարարություն է ընդամենը, և վերջ:
«Խոսքը խաղաղության, հաստատված խաղաղության և այն փայփայելու մասին է, իսկ այն հայտարարությունները, որոնք հնչում են ընդդիմադիր դաշտից, մեր ընկալմամբ՝ չունեն այլ որակում, քան խաղաղությունը վտանգող: Հետևաբար քաղաքական դեմքերն ազատ են անել քաղաքական հայտարարություններ։
Վարչապետը նաև շարունակել է, որ խաղաղությունը ռևիզիայի ենթարկելը պատերազմի դուռ բացելու վտանգ է պարունակում։ Այո՛, դա այդպես է մեր ընկալմամբ»։
