Գյումրու ընտրություններից երկու հարցի պատասխան էինք սպասում՝ մեկը՝ արդյոք ՔՊ-ն կկարողանա նորից վերցնել իշխանությունը, և երկրորդ՝ եթե չվերցնի, ապա որ ուժը կամ անձն է հավակնելու քաղաքապետի պաշտոնին, այսօր տեղի ունեցած մամուլի ասուլիսի ժամանակ ասաց քաղտեխնոլոգ Վիգեն Հակոբյանը։
«Հարցերից մեկի պատասխանն այս պահի դրությամբ ունենք՝ եթե դավադրություններ չլինեն, ՔՊ-ն չի կարողանալու գլխավորել Գյումրին, բայց երկրորդ հարցը դեռ բաց է մնացել։ Բոլորը սպասում են մեկ մարդու՝ Մարտուն Գրիգորյանի հստակ դիրքորոշման։ Իսկ նա դեռևս վերջնական պատասխան չի տվել, թե իր քվեներն ինչ է անելու։
Ամեն դեպքում, երբ ասում ենք, որ ՔՊ-ն Գյումրիում իշխանություն չի վերցրել, փաստ է, որ պարտվել է՝ անկախ նրանից, թե շարքում որերորդ տեղում է։ Գոնե նոմինալ առումով ՔՊ-ն այս պահին չունի գործընկեր, որն անհրաժեշտ ձայներ կփոխանցի՝ իշխանություն ձևավորելու համար։ ՔՊ-ն, փաստենք, որ պարտվել է, այլ հարց է՝ ով է հաղթել»,- ասաց քաղտեխնոլոգը՝ հույս հայտնելով, որ Մարտուն Գրիգորյանն առաջիկա օրերին արդեն իր քվեները կփոխանցի միասնական ընդդիմադիր ֆորմատին։
Ըստ Վիգեն Հակոբյանի՝ եթե Մարտուն Գրիգորյանի և մյուս ընդդիմադիրների համագործակցությունը չստացվի, իրավիճակը կարող է գնալ դեպի քաղաքական փակուղի, ինչն էլ իր հերթին կնշանակի արտահերթ ընտրություններ։
«Չնայած այս իշխանություններն իրենց հայտարարում են ժողովրդավարության բաստիոն, ժողովրդավարության կղզյակ, չնայած հռչակվում է, որ ընտրությունները չեն կեղծվում, պետք է հաշվի առնել, թե ինչ մեթոդաբանություն է կիրառվում ընտրություններից հետո, երբ հաղթող թեկնածուին ուղղակի կարելի է տանել և բանտ նստեցնել, կամ նրան մոտ չթողնել իր աթոռին, ինչպես դա եղավ Վանաձորում»,- ասաց բանախոսը։
Անդրադառնալով Փարաքարում տեղի ունեցած ընտրություններին՝ Վիգեն Հակոբյանն ընդգծեց՝ ընդդիմության հաղթանակը բավական լուրջ է՝ ջախջախիչ թվերով։
«Սա ցույց է տալիս, որ իշխանությունը շարունակում է պարտվել։ Գյումրիում և Փարաքարում տեղի ունեցածն այն նույն տենդենցի շարունակությունն է, որը տեսանք Երևանի ավագանու ընտրությունների ժամանակ։ Տենդենցն այն է, որ այս իշխանություններն այլևս չեն կարողանում ընտրությունների միջոցով վերարտադրվել։ Փարաքարում տեղի ունեցածը շատ լուրջ ահազանգ է իշխանության համար, որովհետև որքան մոտենան Երևանին, այնքան Փարաքարի արդյունքներն ավելի հավանական են լինելու»,- ասաց Հակոբյանը՝ հավելելով, որ Գյումրին ու Փարաքարը հանրության մոտ համապատասխան տրամադրություններ ձևավորեցին։
