«Ման Փիքչերս Փրոդաքշեն» ընկերության հեղինակային՝ «Երախտագիտության քարտեզ» կինոնախագծի երրորդ՝ «Գթության ոսկե շղթա» ֆիլմը թեև ընդամենը մեկ ու կես ամիս է ինչ ավարտված է, բայց Սիդնեյի Ավստրալիայի հայկական ֆիլմերի կինոփառատոնում արդեն կայացել է նրա համաշխարհային պրեմիերան:
Ֆիլմը միարժամանակ ներկայացվում է բազմաթիվ միջազգային կինոփառատոներում և արդեն հասցրել է ստանալ քառասուն մրցանակ:
Ֆիլմի հաջողությունները կարելի է համեմատել նույն շարքի նախորդ՝ «Ամերիկացի բարի սամարացիները» ֆիլմի հետ, որը երկու տարվա ընթացքում մասնակցելով շուրջ 100 միջազգային կինոփառատոնների, արժանացել է 135 մրցանակի:
Ֆիլմի հայստանյան պրեմիերան տեղի կունենա շուտով՝ սեպտեմբերի 14-ին՝ ժամը 18:00-ին, Երևանի Կինոյի տան մեծ դահլիճում:
«Գթության ոսկե շղթա» ֆիլմի մասին՝ հակիրճ. նախագծի նախորդ ֆիլմերը պատմում էին Հայոց ցեղասպանության ժամանակ եվրոպական և ամերիկյան մարդասիրական առաքելությունների մասին, իսկ այս ֆիլմը ներկայացնում է ամենասակավ լուսաբանված, Ավստրալիայի և Նոր Զելանդիայի ցուցաբերած մարդասիրական օգնության մասին, որի շնորհիվ ցեղասպանությունից փրկվեցին և վերապրեցին հազարավոր հայեր, ասորիներ և հույներ:
Ֆիլմը պատմում է հոլիվուդյան հայտնի դերասան Վերնոն Ուելսը: Նկարահանումներին մասնակցել են Ավստրալիայում և Նոր Զելանդիայում ճանաչված պատմաբաններ և անկախ հետազոտողներ:
Նկարահանումները տեղի են ունեցել Ավստրալիայում, Նոր Զելանդիայում, Լիբանանում և Հայաստանում:
Պրոդյուսերy և մտահղացման հեղինակն է Մանվել Սարիբեկյանը, սցենարի հեղինակներն են Ջեյմս Ռոբինսը (Նոր Զելանդիա), Վալերի Գասպարյանը։
«Գթության ոսկե շղթա» ֆիլմի ռեժիսորը Արման Չիլինգարյանն է, օպերատորը՝ Աշոտ Մկրտչյանը, կոմպոզիտորը՝ Արտաշես Քարթալյանը, մոնտաժի ռեժիսորը՝ Տիգրան Բաղինյանը։
