Բաշ-Ապարանից ու Սարդարապատից մեկնարկեցին իրազեկման քայլերթերը

Ընդդիմության իրազեկման քայլերթերը 4 սկզբնակետ ունեն՝ Իջևան, Տիգրանաշեն, այսօրվանից՝ Բաշ-Ապարան և Սարդարապատ։
Երթի մասնակիցները ծաղկեպսակ են դրել Ազատագրական շարժման գործիչ Դրաստամատ Կանայանի գերեզմանին, մատուցվել է հոգեհանգստյան կարգ։ Աղոթքով ու երգով մասնակիցները երթն սկսել են՝ համոզված, որ մինչև Երևան ճանապարհին իրենց շարքերը համալրվելու են։
Երթի մասնակիցները հարգանքի տուրք են մատուցել արցախյան երեք պատերազմներում զոհված ռազմիկների հիշատակին։ Պանթեոնը գտնվում է Ապարանի հուշահամալիրի հարևանությամբ։
Սարդարապատի հուշահամալիրում բարձրացվել է Արցախի դրոշը, մատուցվել է հոգեհանգստյան կարգ։ Մասնակիցները շարժվել են Երևան։ Նրանք ճանապարհին կանգ են առնելու, որպեսզի տարբեր գյուղերում, բնակավայրերում մարդկանց իրազեկեն, թե ինչ է սպասվում Արցախին ու Հայաստանին, եթե ոտքի չկանգնեն, չպայքարեն։
Հիշեցնենք, որ մայիսի 1-ին Երևանում տեղի է ունենալու համազգային հանրահավաք, որին մասնակցելու են իրազեկման քայլերթի 4 ուղղություններով մայրաքաղաք շարժվող մեր հայրենակիցները։