Բայց ինչո՞ւ պետք է չշտապենք կամ չուզենանք, որ լավ բանը շուտ լինի. Ռուբեն Ռուբինյանը՝ խաղաղության պայմանագրի մասին
Մենք ամեն ինչ անում ենք, որ խաղաղության պայմանագիրը օր առաջ կնքվի, ամեն ինչ անում ենք, որ ապաշրջափակումը օր առաջ տեղի ունենա,, ԱԺ-ում լրագրողների հետ զրույցում նշեց ԱԺ փոխխոսնակ Ռուբեն Ռուբինյանը:
«Հիմա փորձ է արվում խաղաղության պայմանագրի ստորագրումը դարձնել հնարավոր, և մենք այդ ուղղությամբ անում ենք ամեն ինչ»,- ասաց նա:
Լրագրողները հետաքրքրվեցին հնարավո՞ր է, որ ինչ-որ փուլում բանակցություններում միջնորդի անհրաժեշտություն ծագի, ինչին ի պատասխան Ռուբինյանը նկատեց՝ ամեն ինչ էլ հնարավոր է։
«Բայց այս փուլում բանակցությունները երկկողմ են ընթանում: Հեռնց սկզբից էլ ԱԳ նախարարների մակարդակով բանակցությունները ձևաչափը եղել է երկկողմ: Բուն բանակցությունների ժամանակ կողմերը սենյակում մենակ են եղել: Ես չեմ կարող բացառել, որ կարող է ինչ-որ ժամանակ փոխվել ֆորմատը, բայց մինչ այս պահը այդպես է եղել: Հարցը պրագմատիզմի և պրակտիկության մեջ է»,- նշեց ԱԺ փոխխոսնակը:
Ինչ վերաբերում է դիտարկմանը, որ Հայաստանը կարծես շտապում է կանոնակարգը վավերացնել, Ռուբեն Ռուբինյանը պատասխանեց՝ բայց ինչո՞ւ պետք է չշտապենք կամ չուզենանք, որ լավ բանը շուտ լինի:
