Պետական ֆինանսական ուղիղ աջակցություն է ստացել արցախցի 108 հազար ընտանիքից՝ մոտ 100 հազարը. այս մասին տեղեկացրել Արցախի աշխատանքի, սոցիալական և բնակարանային հարցերի նախարար Մանե Թանդիլյանը՝ Աժ նիստի հարցուպատասխանի ընթացակարգի ժամանակ:
Մանե Թանդիլյանը հայտնել է, որ հրատապ լուծում պահանջող խնդիրների մոտ 98 տոկոսը պետական ֆինանսական ուղիղ աջակցությամբ լուծում է ստացել:
«Արցախցի միջին՝ 5 հոգանոց ընտանիքը ստացել է 2 միլիոն դրամի չափով պետական ուղիղ աջակցություն: Այդ շրջանակներում բազմաթիվ ընտանիքներ ապահովվել են կենցաղային տեխնիկայով,գույքով,կացարանով:Սոցիալական մի շարք խնդիրների լուծման հարցում՝ առկա են որոշ ենթակառուցվածքային խնդիրներ, որոնք պատրաստ չէին պատերազմական ու հետպատերազմական իրավիճակին: Ամենօրյա ռեժիմով ստանում ենք այդպիսի բազմաթիվ խնդիրների վերաբերյալ բարձրաձայնումներ և հետամուտ ենք դրանց լուծմանը: Հրատապ ու չլուծված խնդիրներից է բնակարանային ապահովումը: Այս հարցի լուծումը դիտարկում ենք գյուղական բնակավայրերում: Այժմ քննարկում ենք այնպիսի ծրագիր, որի միջոցով մարդիկ համոզված կլինեն՝ երբ և ինչպիսի բնակարան կստանան»,-ասել է Արցախի աշխատանքի, սոցիալական և բնակարանային հարցերի նախարարը: Մարտունու, Ասկերանի, Շուշիի շրջանների՝ մեր վերահսկողության ներքո գտնվող բնակավայրերում վերահաստատվելու կոչին արդեն 300 քաղաքացի է արձագանքել:
