«Ասա՛ քո ոչը՝ հանուն Արցախի, հանուն Հայաստանի» կոչով հանրահավաքը կայացավ ապրիլի 5-ին, Ազատության հրապարակում։ Այն կազմակերպել էր խորհրդարանական ընդդիմությունը՝ «Պատիվ ունեմ» և «Հայաստան» խմբակցությունները։
Ընդդիմադիր գործիչներն իրենց ելույթներում հնչեցրին Հայաստանն ու Արցախը ճգնաժամային իրավիճակից հանելու կոչեր, քննադատեցին իշխանություններին, հատկապես՝ Նիկոլ Փաշինյանին, ասացին, որ նա սպասարկում է Ադրբեջանի և Թուրքիայի շահերը, որ Հայաստանն ու հայ ժողովուրդը երբեք այսպիսի օրհասական վիճակում չէին գտնվել։
Ընդդիմությունը կոչ արեց հայ ժողովրդին մի բռունցք դառնալ թե՛ հայաստանում, թե՛ Արցախում, թե՛ Սփյուռքում և պայքարել հայկական երկու պետությունների թուրքացման ծրագրի դեմ։
1,5 ժամ ելույթներից հետո հանրահավաքի կազմակերպիչները ցուցարարներին տեղեկացրին, թե ինչ են պատրաստվում անել, իսկ մինչ այդ, ասացին, որ նոր պայքարի մեկնարկը տրված է, այն շարունակական է լինելու։
Ազատության հրապարակի բեմից հնչեցված հրահանգով հանրահավաքի մասնակիցները շարժվեցին դեպի Ֆրանսիայի հրապարակ, որպեսզի փակեն հարակից բոլոր փողոցները։
«Առանց Նիկոլ Հայաստան», «Առանց թուրքի Հայաստան» վանկարկումներով ցուցարները մեկ ժամից ավելի փակ պահեցին Սայաթ Նովա, Թումանյան, Մաշտոց, Բաղրամյան, Մոսկովյան, Իսահակյան փողոցները։
