Եթե նկատել եք, այս իշխանությունները փորձում են հասկանալ Հայոց ցեղասպանությունը, փորձում են հասկանալ լուսանկարներում ակնհայտ խոշտանգված Ռուբեն Վարդանյանի վիճակը, այսինքն՝ այդ մարդկանց ինտելեկտը չի բավարարում այն մարտահրավերներին, որոնք այսօր ծառացած են մեր առջև։ Azg.am-ի թղթակցի հետ զրույցում նման տեսակետ հայտնեց իրավապաշտպան Լարիսա Ալավերդյանը՝ անդրադառնալով ՀՀ Մարդու իրավունքների պաշտպան Անահիտ Մանասյանի այն հայտարարությանը, որ տեսել են Ռուբեն Վարդանյանի՝ ակնհայտ խոշտանգման հետքեր կրող լուսանկարները և փորձում են հասկանալ՝ իրենց մանդատի շրջանակներում ինչ կարող են անել։
«Եթե այս իշխանությունները Թուրքիայի գործած ոճրագործությունից 110 տարի հետո դեռ նոր պետք է փորձեն հասկանալ Ցեղասպանությունը, եթե Արցախի ռազմաքաղաքաակն էլիտայի՝ մեկուկես տարի ադրբեջանական բանտերում լինելուց հետո նոր միայն պետք է փորձեն հասկանալ նրանց ողբերգական վիճակը, ըստ երևույթին՝ նրանց ուղղեների հնարավորությունները թույլ չեն տալիս պատշաճ ընկալել պարզ իրողությունները։ Եթե պարզ իրողությունները հասկանալն իրենց համար դժվար է, թող հարցնեն մասնագետներին։
Ես, որպես, մարդու իրավունքների պաշտպան, կարող եմ ասել, որ ԱՀ ռազմաքաղաքական էլիտայի ձերբակալման առաջին իսկ պահից Հայաստանի Հանրապետությունն իրավունք ուներ պահանջել վերջիններիս էքստրադիցիան։ Բայց ՀՀ իշխանություններն արդյոք դիմել են, որ Բաքվի կողմից բազմաթիվ հանցագործությունների մեջ մեղադրվող այդ անձինք տեղափոխվեն Հայաստան և այստեղ դատվեն։
Երկրորդ, արդյոք ՀՀ իշխանությունները դիմել են ՄԱԿ-ի կազմակերպություններին՝ Խոշտանգումների դեմ կոմիտեին, Մարդու իրավունքների հանձնաժողովին, Մարդու իրավունքների կոմիտեին և այլ մարմինների։ Դիմե՞լ են»,- հարց հնչեցրեց Լարիսա Ալավերդյանը։
Ըստ իրավապաշտպանի՝ կարելի է միայն պատկերացնել, թե որքան ժամանակ է պետք գործող իշխանություններին, որպեսզի նրանց փորձերը հաջողությամբ ավարտվեն։
«Դա նշանակում է, որ մինչ օրս արված և չարված քայլերն ի վնաս Բաքվի բանտերում պահվող հայ գերիների են։ Պատկերացրեց՝ եթե կառավարության գլուխ հանդիսացող անձը հրապարակային կերպով կասկածներ է հայտնում, որ Ռուբեն Վարդանյանը ՌԴ կողմից անհայտ նպատակներով ուղարկված անձ է, ապա ինչեր կարող է նրա մասին ասել ոչ հրապարակայնորեն։ Այնպես որ, իրենց հայտարարություններով այս իշխանությունները միայն ապացուցում են իրենց ցանկությունը՝ Ադրբեջանի ձեռքերով հաշվեհարդարի տեսնել այդ անձանց հետ։
Կրկնում եմ՝ եթե այս իշխանություններն ինչ-որ բաներ չեն հասկանում, պետք է հարցնեն, եթե չեն հարցնում՝ նշանակում է՝ Ադրբեջանի արարաքները լիովին համապատասխանում են գործող իշխանությունների նպատակներին»,- ասաց Լարիսա Ալավերդյանը։
Հիշեցնենք, որ Ռուբեն Վարդանյանի փաստաբան Ջարեդ Գենսերը հայտնել է՝ իր պաշտպանյալի վիճակն ադրբեջանական բանտում կտրուկ վատացել է։
Մեկ շաբաթվա հացադուլից հետո Ռուբեն Վարդանյանը առողջական վտանգավոր վիճակում է. նա կորցրել է 6 կգ քաշ, զարկերակային ճնշումը հասել է վտանգավոր 140/110 մակարդակի, իսկ պուլսը զգալիորեն գերազանցում է նորման: Չնայած դրան՝ նրան բռնի ուժով տեղափոխել են դատարան։
Այս ամենի ֆոնին ՀՀ ՄԻՊ-ն այսօր հայտարարել է, որ տեսել են Ռուբեն Վարդանյանի՝ ակնհայտ խոշտանգման հետքեր կրող լուսանկարները և փորձում են հասկանալ՝ իրենց մանդատի շրջանակներում ինչ կարող են անել։
