Այս ընտրությունները չեն եղել Սահմանադրության 7-րդ հոդվածին համապատասխան, չեն եղել ազատ, հավասար։ Սահմանադրական դատարանում ներկայացրել ենք համակարգային, զանգվածային, պարբերական բնույթ կրող ընտրախախտումները, ՍԴ-ում այսօր կայացած ԱԺ հերթական ընտրությունների արդյունքները վիճարկող 7 քաղաքական ուժերի դիմումների հիման վրա միացված գործի քննությանն իր ելույթում հայտարարեց «Ուժեղ Հայաստան» դաշինքի ներկայացուցիչ, փաստաբան Արամ Վարդևանյանը։
Նա նշեց, որ իրենց դիմումում ներկայացրել են այն խումբ ընտրախախտումները, զանգվածային բնույթի ընտրախախտումները, որոնք բաժանել էին մի քանի փուլերի՝ մինչև քվեարկության օրը, նախընտրական շրջան, քվերակության օր, դրան հաջորդած ժամանակահատվածում լիազոր մարմնի ակնհայտ ոչ իրավաչափ գործողությունները։
«Պարզեցինք, որ գործով պատասխանող ԿԸՀ-ն մի շարք հարցերի վերաբերյալ պատասխան չունի, տեսանք՝ դատաքննության ընթացքում ինչպես հարցերին չպատասխանեց։ ՍԴ-ում՝ սահմանադրական արդարադատության շրջանակներում, անգամ ականատեսը եղանք, որ Սահմանադրական դատարանում պատասխանողը օգտվեց փաստացի լռելու իրավունքից, Բարձր դատարանի դատավորների մեկի ուղիղ հարցադրմանը պատասխան ընդհանրապես չտրվեց։
«Հենց դատաքննության ընթացքում տեսանք, թե ինչպես է հնարավոր, որ նույն ԿԸՀ-ն, լինելով պատասխանող, ունենա պահեստային պատասխանող՝ ի դեմս երրորդ անձի։ Սա խնդի՞ր է, Բարձր դատարան, թե ոչ, էական ազդեցություն ունեցող խնդի՞ր է, թե ոչ»,- ասաց Վարդևանյանը։
