ԱՄՆ ղեկավարությունը հասկանում է, որ Զանգեզուրի միջանցքը կարևոր նախագիծ է, քանի որ այն կկապի Ադրբեջանը Նախիջևանի շրջանի հետ. բռնազավթված Շուշիի IV գլոբալ մեդիա ֆորումում հայտարարել է Ադրբեջանի նախագահ Իլհամ Ալիևը:
«Նրանք շատ արդյունավետ աշխատեցին, նաև Հայաստանի համար պարզ դարձրին, որ այս խաղաղությունը նույնպես կարևոր է։ Սպիտակ տանը տեղի ունեցած պատմական հանդիպման ժամանակ նախագահ Թրամփը, ես և Հայաստանի վարչապետը ստորագրեցինք եռակողմ հայտարարություն։ Երկու երկրների արտաքին գործերի նախարարները նույնպես նախաստորագրեցին խաղաղության համաձայնագիրը», – ասել է Ալիևը։
Նա հայտարարել է, որ իր երկրում գաղափարախոսական սադրանքների հետ կապված ռիսկերը լուրջ չի համարում, և որ «Ադրբեջանական պետությունն ու հասարակությունը անսասանորեն հավատարիմ են Սահմանադրությամբ ամրագրված սկզբունքներին»
«Բարեբախտաբար, Ադրբեջանը չունի ո՛չ առկա, ո՛չ էլ պոտենցիալ ներքին ռիսկեր։ Ինչ վերաբերում է ֆիզիկական սպառնալիքներին, դրանք անկասկած գոյություն ունեն։ Հաշվի առնելով ժամանակակից պատերազմի բնույթը, գործնականում ոչ մի երկիր չի կարող իրեն լիովին անվտանգ համարել։ Սա հատկապես ճիշտ է երկու պատերազմող պետությունների միջև գտնվող երկրի համար։ Ավելին, անհնար է լիովին կանխատեսել այդ պատերազմների ընթացքը կամ դրանց հետագա հետևանքները»,-ասել է Ալիևը։
