Այդ մասին գրել է Կ. Պոլսո «Հայ Թերթ» կայքէջը, սակայն սկզբնաղբյուրը իսլամամետ «Աքիթ» պարբերականն է:
Նախքան հրապարակման բովանդակությունը ներկայացնելը, հիշեցման կարգով նշենք, որ աշխարհահռչակ թուրք առաջադեմ գրող Ազիզ Նեսինն անծանոթ չէ հայ ընթերցողին: Ինչ վերաբերում է նրա հարսին՝ Հիլալ Նեսինին, ապա նրա մասին մեզ, թեկուզ դատապարտելու մղումով, ծանոթացնում է թուրք իսլամականների «Աքիթ»-ը և վատ էլ չի անում, որքան էլ բովանդակությամբ սանձարձակ լինի: Ահա թե ինչ է գրել.
«Երզնկայի Իլիչ գավառում տեղի ունեցած սողանքը շահագործման մեջ գտնվող ոսկե հանքում փլուզման պատճառ էր դարձել, որի հետևանքով 9 հանքափոր մնացել է փլատակների տակ: Մինչ աղետի վայրում շարունակվում էին փրկարարական աշխատանքները, ահա սոցցանցում սկանդալային ելույթով ասպարեզ է իջնում Ազիզ Նեսինի՝ հայության սիրահար հարսը՝ Հիլալ Նեսինը, անարգում է թուրք ազգին և դառնում հակազդեցության թիրախ:
Հիլալ Նեսինը ելույթում ասում է. «Կհավատա՞ք, մազաչափ անգամ չեմ ափսոսացել սողանքի համար, նույնիսկ մտածել, թե ինչո՞ւ Երզնկան ամբողջությամբ չի ընկել փլատակների տակ: Ափսոսը, թերևս, բնական միջավայրն է եղել»:
Նա դրանով ծաղրում է դժբախտ պատահարի զոհերին:
Ավելին՝ այս հարսը դեռ չափն էլ անցնում և հավելում է. «Իր դահիճին սիրահարված ազգը, ազան կլսի, թե զանգերի ղողանջ, եթե չի ընդդիմանում, վերածվում է ողոմելի մի խաժամուժի: Հետևաբար արժանի է ամեն մի ստորացման»:
Հայերի համար լացուկոծ էր դրել
«Աքիթ» պարբերականը գրում է. «Վերջին ամիսներին, շնորհիվ հակաահաբեկչական գործողությունների, երբ Ղարաբաղը հայկական 30-ամյա օկուպացիայից հետո վերստին միացավ Ադրբեջանին, Ղարաբաղը պաշտոնապես ադրբեջանական տարածք չհամարող Հիլալ Նեսին հայկական լացուկոծ դրեց և Ադրբեջանին հռչակեց օկուպանտ, իսկ մեզ՝ բռնազավթման հանդիսատես»:
Հակոբ Չաքրյան
