Ֆրանսիայի նախագահ Էմանուել Մակրոնի «հակաադրբեջանական հայտարարությունները», որոնք նա արել է Մարսելի հայ համայնքի հետ հանդիպմանը և որոնք արտացոլում են միակողմանի աջակցություն Հայաստանին, անընդունելի են. հայտարարել է Ադրբեջանի ԱԳՆ-ն:
Ինչպես արդեն տեղեկացրել ենք, Ֆրանսիայի նախագահ Մակրոնը տեղի հայ համայնքի հետ հանդիպման ժամանակ ասել է. «Ես Ալիևի վրա ավելի մեծ ճնշում եմ բանեցրել և կբանեցնեմ, քան Փաշինյանը։ Հարցը Փաշինյանն է։ Ես Արցախի հարցով միակն եմ, որը հստակ կեցվածք և պատգամ ունեմ»։
Ադրբեջանի ԱԳՆ-ը Մակրոնի հայտարարությանն արձագանքել է.
«Ադրբեջանի նախագահ Իլհամ Ալիևի վրա ճնշում գործադրելու հայտարարությունները Ֆրանսիայի նախագահ Մակրոնի երևակայության արգասիքն են։ Ադրբեջանի նախագահի վրա ճնշում գործադրելու փորձերը երբեք արդյունք չեն տվել: Նախագահ Մակրոնի հայտարարությունը ևս մեկ անգամ ցույց է տալիս, որ նա գործիք է։ Ֆրանսիայի հայկական լոբբիի ձեռքում… Հայաստանի կողմից Ադրբեջանի տարածքային ամբողջականության ճանաչման և Ղարաբաղի տարածաշրջանը որպես Ադրբեջանի անբաժան մաս ճանաչելու ֆոնին նախագահ Մակրոնի նման կողմնակալ հայտարարությունները ոչ միայն խոչընդոտում են տարածաշրջանում խաղաղության և հանգստության հաստատմանը, այլ նաև նպաստում են անջատողականությունը և ահաբեկչությունը խրախուսողների և աջակցողների ապակառուցողական գործունեության հետագա ընդլայնմանը», – ասված է Ադրբեջանի ԱԳՆ հայտարարությունում:
