Կիրանց գյուղի վարչական ղեկավար Կամո Շահինյանին հարցրի, թե ի՞նչ փուլում է սահմանազատման հետևանքով տներ, տարածքներ կորցրած Կիրանցի բնակիչներին պետության կողմից փոխհատուցման գործընթացը։ Նա ասաց, որ այդ գործով ինքը չի զբաղվում, միայն գիտի, որ Ադրբեջանին հանձնվելիք տներից մեկի տիրոջ ՝ Խանում Թամրազյանի համար Իջևան քաղաքում 3 սենյականոց բնակարան է գնվել, սակայն նա Կիրանցում բնակվելու համար վագոն-տնակ է դրել. Պատմում է տավուշցի լրագրող Ոսկան Սարգսյանը։
Նա նաև հավելում է, որ Ադրբեջանին հանձնվելիք մյուս տան տան տերը՝ Մհեր Սիմոնյանը, շարունակում է Կիրանցում բնակվել։
Ոսկան Սարգսյանը ներկայացնում է իրավիճակը՝ առավել մանրամասն.
Վարչական ղեկավարին հարցրի Խերմլի գյուղի տարածքին կից, Կիրանցին պատկանող 45 հեկտար հողերը մշակելու հետագա հնարավորության մասին. սահմանազատման հետևանքով այդ հողեր տանող ճանապարհը անցել է Ադրբեջանին։ Նա ասաց,․ որ այդ հողերից գրեթե 30 հեկտարում ցորեն է ցանված, մնացած հողերում նախատեսում էին ծխախոտ մշակել, սակայն այս տարի, կապված իրավիճակի հետ, ծխախոտ չեն մշակել, չեն ցանել։
Վարչական ղեկավարը հայտնեց, որ Կիրանց գյուղից այդ հողերը տանող այլընտրանքային ճանապարհ, կամուրջ կկառուցվի։ Ներկայում ընթացքի մեջ է միջպետական ավտոճանապարհի նոր հատվածի և կամրջի շինարարությունը, ճանապարհը ձգվելու է Աճարկուտ գյուղով։ Նոր կամուրջը, ըստ Կամո Շահինյանի, կաոռւցվում է գետի վրա հողի մեծ լիցք անելու եղանակով։
Նոր ճանապարհի շինարարությունն իրականացնում է Էդվարդ Բեզոյանի «Ճանապարհ» ընկերությունը, այն պետք է պատրաստ լինի հուլիսի 24-ին։ Շահինանն ասաց, որ Կիրանցի բնակիչները չեն ցանկանում, որ իրենց երեխաները աշնանը հաճախեն սահմանազատման հետևանքով սահմանին շատ մոտ հայտնված, նորակառույց դպրոց։ Նշեմ, որ այդ դպրոցի շինարարության համար պետբյուջեից 615 միլիոն դրամ է ծախսվել։ Շահինյանն ասաց, որ կառավարությունը խոստացել է Կիրանցի համար դպրոցի նոր շենք կառուցել, իսկ դպրոցի նորակառուց շենքը կարող է օգտագործվել այլ նպատակներով։ Կիրանցի վարչական ղեկավարն ասաց, որ բնակիչների մեջ գյուղից հեռանալու տրամադրություններ չկան, չնայած չի բացառվում, որ մեկ կամ երկու ընտանիք որոշի այլ վայր տեղափովել։ Նա հավելեց, որ Կիրանցում շատ հողերի կադաստրային նշանակությունը փոխում են, որպեսզի դրանք տրվեն տուն, տարածքներ կորցրած Կիրանցի բնակիչներին ՝ առանձնատան, հասարակական օբյեկտի կառուցման նպատակով։
