Փարիզում ներկայացվել են 2024-ի Օլիմպիական եւ Պարալիմպիկ խաղերի մեդալները։ Այս մասին հայտնում է Միջազգային օլիմպիական կոմիտեի պաշտոնական կայքը։
«Ոսկե, արծաթե եւ բրոնզե մեդալների մեջտեղում երկաթե ձուլակտոր կա՝ վերցված Էյֆելյան աշխատարակից։ Բանն այն է, որ տարիների հետ փոխվում են աշտարակի ոչ պիտանի, փտած մասերն ու դրանք փոխարինվում առավել դիմացկուն երկաթով։ Եվ, փաստորեն, երկաթի՝ դարն ապրած կտորներին երկրորդ կյանք է շնորհվել, եւ դրանք օգտագործվել են լավագույն մարզիկներին շնորհվող մեդլաներում»,- գրում են տեղական լրատվամիջոցները։
Մրցանակ–մեդալները նախագծել է «Chaumet» ընկերությունը, որ հայտնի է թանկարժեք զարդերով եւ ժամացույցներով։ Մեդալները սակայն պատրաստել է ոչ թե վերոնշյալ ընկերությունը, այլ Ֆրանսիայի ազգային դրամահատարանը։
Նշենք, որ Փարիզի Օլիմպիական խաղերը տեղի կունենան 2024-ի հուլիսի 26-ից օգոստոսի 11-ը։ Օլիմպիական խաղերի պատմության մեջ առաջին անգամ դրա բացման արարողությունը տեղի կունենա ոչ միայն մարզադաշտում, այլեւ դրանից դուրս․ մարզիկները նավարկելու են Սենայի երկայնքով՝ անցնելով գետի մոտ 6 կմ հատված։ Փարիզ ժամանած մարզասերներն ու տեղացիները հենց գետի ափից կարողանալու են հետեւել նավարկող մարզիկներին։
Հավելենք նաեւ, որ ի սկզբանե որոշվել եւ հայտարարվել էր, որ Ֆրանսիայի մայրաքաղաքը խաղերի բացման արարողությանը կարող է հյուրընկալել 6000 մարդ, հետագայում սակայն այդ թիվը կրճատվել էր կրկնակի։
Ս․Վ․
