ՔՊ-ն այդպես էլ չմարսեց այդ պարտությունը և այս 6-7 ամիսներին հարձակվում է թե՛ քաղաքապետի, թե՛ այլ գործիչների վրա, ովքեր ողջունեցին պարոն Ղուկասյանին որպես քաղաքապետ, սատարեցին և ձևավորեցին ընդդիմադիր ավագանի։ Այս մասին այսօր լրագրողների հետ զրույցում ասաց ԱԺ «Հայաստան» խմբակցության պատգամավոր Մհեր Մելքոնյանը, ով քիչ առաջ էր դուրս եկել քաղաքապետարանի շենքից։
Նա հայտնեց, որ ՔՊ-ն ամեն գնով փորձելու է զավթել Գյումրին և անցնելու է մյուս համայքներին, որոնք ղեկավարում են ընդդիմադիր գործիչներ։
Մելքոնյանն ասաց՝ Վարդան Ղուկասյանը ՔՊ-ի վարքագծից զգում էր կատարվելիքը, դրա համար փոխքաղաքապետի պաշտոնը պահանջեց։
«ՔՊ կուսակցության անդամների վարքագծից արդեն պարզ էր, որ անպայման գնալու են այսպիսի գործողությունների»,-նշեց Մելքոնյանը։
Ավելի վաղ ուժային կառույցների աշխատակիցները մտել էին Գյումրիի քաղաքապետարան։
Դիմակավորված հատուկջոկատայինները արգելել են աշխատակիցների ելքն ու մուտքը։ Քաղաքացիներ են հավաքվել քաղաքապետարանի դիմաց, որտեղ մեծ թվով ոստիկանական ուժեր են բերվել։
Ավելի ուշ Հակակոռուպցիոն կոմիտեն հաղորդագրություն տարածեց՝ տեղեկացնելով, որ քաղաքապետարանի 8 աշխատակիցներ, այդ թվում՝ քաղաքապետ Վարդան Ղուկասյանը, ձերբակալվել են կաշառք ստանալու և տալու մեղադրանքներով։
Ձերբակալվածների թվում է նաև քաղաքի գլխավոր ճարտարապետ Հենրիկ Գասպարյանը։ Հակակոռուպցիոն կոմիտեի տարածած հաղորդագրության մեջ կար գաղտնալսված մի ձայնագրություն, որտեղ խոսակցություն էր քաղաքապետի ու գլխավոր ճարտարապետի միջև։
