Կառավարության օրակարգում է Հայաստանի Հանրապետությունում սեփականաշնորհման ընթացակարգում թույլ տրված խախտումներով բոլոր գույքերի նկատմամբ ուսումնասիրություն իրականացնելը, և դուք այսօր էլ տեսնում եք հատիկ առ հատիկ Հայաստանի Հանրապետությանը վերադարձվող գույքերը, այսօր լրագրողների հետ զրույցում նշեց Կադաստրի կոմիտեի ղեկավար Սուրեն Թովմասյանը՝ պատասխանելով այն հարցին, թե արդյոք կառավարությունում քննարկվում է Մայր Աթոռից անշարժ գույքեր վերցնելու հարցը։
«Բոլոր այն դեպքերում, որի ժամանակ, որի շրջակայքում թույլատրվել են օրենսդրական խախտումներ, այդ բոլոր դեպքերը պետք է ուսումնասիրության առարկա դառնան և դառնում են՝ անկախ դրանից, թե ինչ գույքի է դա վերաբերում։ Այլ հարց է, որ մենք պետք է կարգավորենք օրենսդրական խնդիրները, որոնք նախկինում թույլ են տրվել, և դրանից հետո արդեն առանձին-առանձին որոշումներ կայացվեն»,–ասաց նա։
Հարցին՝ եթե Եկեղեցուց գույքեր վերցվեն, դրանք ի՞նչ են անելու, արդյոք կցվելու են Պետական գույքի կոմիտեին, Սուրեն Թովմասյանը պատասխանեց.
«Երբ դուք այդ հարցը տալիս եք, որևէ նման դեպք այս պահի դրությամբ ձեզ հայտնի՞ է։ Ես չեմ կարող ասել, դիմեք լիազոր մարմնին, կասեն, թե եկեղեցին ինչ կանեն»։
Հարցին՝ շա՞տ են այն հոգևորականները, որոնք ապօրինի ծագման գույքեր ունեն (օրինակ, Տեր Նավասարդ արքեպիսկոպոս Կճոյանի գույքի օրինականությունը վիճարկվում է դատարանում), Կադաստրի ղեկավարն ասաց՝ ինքը եկեղեցականների վերաբերյալ տեղեկատվություն չունի։
«Եթե Հայաստանի Հանրապետության քաղաքացի է, աշխատավայրը, որպես այդպիսին, կադաստրի կոմիտեին հայտնի չէ։ Աշխատավայրերի վերաբերյալ կադաստրի կոմիտեում ինֆորմացիա չկա այս պահի դրությամբ»,- ասաց նա։
Հետևեք մեզ նաև Տելեգրամում։
