Ադրբեջանի ԶՈՒ ստորաբաժանումները այսօր՝ կեսօրին, կրկին հարձակվել են արևելյան ուղղությամբ տեղակայված հայկական մարտական դիրքերի վրա և ընթանում է փոխհրաձգություն։
Գեղարքունիքի խոշորացված Գեղամասար համայնքի ղեկավար Հակոբ Ավետյանը «Փաստինֆո»-ին տեղեկացրեց, որ փոխհրաձգությունը սահմանամերձ դարձած Սոթքում է ընթանում։
«Հենց Սոթքի հատվածում է փոխհրաձգությունը՝ հանքի ուղղությամբ»։
Նրա տեղեկություններով՝ թշնամին ունի մարդկային կորուստներ։
«Իրենք շատ տեղերում հաջողության հասնելու նպատակ ունեն, բայց եթե մի դիրքն էլ փորձում են թիրախավորել ու գրավել, ուրեմն հատուկ, կարևոր նշանակություն ունեցող դիրք է լինում, որ դրանով կարող են ամրապնդվել։ Փառք աստծու, կանգնած տղերքին շատերին ճանաչում եմ, գիտեմ, որ պատրաստ են ամեն գնով պաշտպանել»,- ասել է Ավետյանը։
Ըստ համայնքապետի՝ այս պահին ինքնապաշտպանության անցնելու կարիք չկա. կապվել է տեղում գտնվող զինվորականների հետ, բանակը վերահսկում է իրավիճակը։
«Աստված չանի, եթե կարիք լինի, ժողովուրդը միասնական ձևով պատրաստ է պաշտպանելու։ Իրավիճակը շատ լարված է, բայց այս պահի դրությամբ մերոնք կարողանում են վերահսկել, չեմ կարծում, որ իրենց կհաջողվի առաջխաղացում ունենալ։
Ամեն դեպքում կրակոցներ են, երկու կողմը տարբեր զենք ու տեխնիկա է կիրառում։ Դեռ մեծ անհանգստություն չկա, կարծում եմ՝ մեր տղաները կարող են վերահսկել»։
Այս պահին բարձունքում եղանակային պայմանները բարենպաստ չեն, սակայն ձնապատ բարձունքները խոչընդոտում են միայն հարձակվողներին։
Նրա խոսքերով՝ սարերում ձյուն է՝ մանավանդ դիրքերի հատվածում, որը դժվարություն է ստեղծում հարձակվողի համար, իսկ հարձակվողին հեշտ է հետ շպրտելը։ «Եթե փորձեն առաջ գալ, եղանակային պայմանները ի նպաստ մեզ են։ Մեր տղերքը հզոր են, հոգով-սրտով»,-ասել է Ավետյանը՝ նշելով, որ հակառակորդը շատ է գերազանցու միայն քանակով, ֆինանսով, աջակցությամբ։
Փոխհրաձգությունը Սոթք բնակավայրից 7-8 կմ հեռավորության վրա է, չնայած Ավետյանը նշեց, որ կիրառվող զինատեսակները այնպիսին են, որ եթե ցանկանան թիրախավորել, հեշտ հասանելի է։
Համայնքապետի կարծիքով՝ հստակ է, որ հակառակորդը ուզում է բարելավել դիրքերը, կատարել երկրի ղեկավարի երազանքները։
«Մեզ բոլորիս էլ պարզ է՝ Ալիևը մինչև հիմա մեծ պահանջներ ունի՝ «Զանգեզուրի միջանցք», ինչպես նաեւ Վարդենիսի տարածքում շատ մեծ սահմանային հատվածներում է ուզում առաջխաղացում ունենալ, որ ավելի ամուր դիրքավորվեն։
Ցանկությունը ունեն, փորձերն արվում են, բայց մեզ ուժեղ գտնվել է պետք, որպեսզի թույլ չտանք, որ առաջ գան»,- նշել է մեր զրուցակիցը։
Աղբյուր` Փաստինֆո
