Տավուշի չորս գյուղերը ստանալուց անմիջապես հետո Ալիևը հայտարարել է,որ Հայաստանի Հանրապետությունը պետք ճանաչի Խոջալուի այսպես կոչված «ցեղասպանությունը» և ներողություն խնդրի։
Իհարկե, սա սպասելի էր։
Խոջալուի դեպքերը տեղի են ունեցել հեռավոր 1992 թվականի փետրվարի 25-26-ին, երբ Արցախի ինքնապաշտպանական ուժերը Ստեփանակերտի արկակոծման վտանգը չեզոքացնելու համար ճնշեցին թշնամու կրակակետերը։
Գործողության արդյունքում ավանի յոթ հազար բնակիչները դիմել են փախուստի, որի ընթացքում էլ, ըստ Ադրբեջանի տվյալների, մոտ 457 քաղաքացիական անձ է մահացել։ Հետաքրքիր է այն փաստը, որ մինչև հարձակումը, հայկական կողմը բազմիցս ռադիոյով հորդորել է տեղի բնակիչներին լքել քաղաքը և տրամադրել է հումանիտար միջանցք։
Հարձակման գիշերը քաղաքացիական անձիք չեն օգտվել այդ միջանցքից և քաղաքից փախչող օմոնականների հետ հայտնվել են Ադրբեջանի ժողովրդական ճակատի զինյալների տեսադաշտում՝ Աղդամի և Նախիջևանիկ գյուղի միջև։
Կորուստների մասին ստացած լուրերից հետո Ադրբեջանի նախագահ Մութալիբովը հայտարարեց, որ այդ սադրանքը կազմակերպել է ժողովրդական ճակատը՝ իրեն պաշտոնազրկելու նպատակով։
Չեխ լրագրող Դանա Մազալովային (հրատարակվել է 1992 թվականի ապրիլի 2-ին Նեզավիսիմայա գազետայում) տված հարցազրույցում Ադրբեջանի նախագահ Այազ Մութալիբովը, որը մինչ այդ հրաժարական էր տվել, հաստատել է իր դիրքորոշումը և կրկին հանցագործության մեջ մեղադրել իր հրաժարակաին ձգտող ադրբեջանական անանուն ուժերին։
Ճիշտ է, հետագա տարիներին Մութալիբովը փորձեց մասնակի հրաժարվել իր արտահայտած դիրքորոշումից, բայց ակնհայտ է, որ թուլացած Ադրբեջանում ներքաղաքական գզվռտոցն էսկալացիայի տանելու համար ժողովրդական ճակատի ղեկավարները զոհաբերության ակտ կատարեցին, որի շահառուն դարձավ Աբուլֆազ էլչիբեյը։ Նա արտաքնապես և քաղաքական ձեռագրով բավականին նմանություն ունի ՀՀ ներկա քպ առաջնորդի հետ։ Թեմայի հետ կապված մի դիտարկում ևս կա, որը յուրօրինակ թեսթ է լինելու քպ առաջնորդի համար։
2019 թվականի նոյեմբերին ՀՀ վարչապետը Խոջալուի դեպքը անվանեց «բացահայտ սուտ»՝ ասելով, որ այն «իրագործվել է Ադրբեջանի կողմից»։ Հասկանալի է, որ ներողության մասին պահանջը կատարվելու է, բայց ինչպե՞ս, եթե դու դա արդեն հերքել ես պաշտոնապես։
Սպասենք զարգացումներին։
Հրայր Կամենդատյան, «Հայաքվե» նախաձեռնության ներկայացուցիչ
