Նիկոլ Փաշինյանին անվստահություն գործընթաց չնախաձեռնելու ժամանակագրություն այս պահին ունի այս տեսքը.
• «Քաղաքացիական պայմանագիր» խմբակցության պատգամավոր Արսեն Թորոսյանը հրապարակային կերպով, առանց ընթերցելու պատռել է իրեն հասցեագրված, մեր կողմից ուղարկված գրությունը։
• «Քաղաքացիական պայմանագիր» խմբակցության պատգամավոր Թագուհի Ղազարյանը գրավոր պատասխանել է մեր գրությանը՝ նշելով, որ չի պատրաստվում նախաձեռնել նման գործընթաց։
• «Հայաստան» խմբակցության բոլոր պատգամավորների անունից տարածվել է հայտարարություն, որտեղ նշված են այդ գործընթացն իրենց կողմից չնախաձեռնելու, իսկ այլոց նախաձեռնության դեպքում իրենց միանալու անհասկանալի նախապայմաններ։
• «Քաղաքացիական պայմանագիր», «Հայաստան» և «Պատիվ ունեմ» խմբակցությունների, մի շարք պատգամավորներ, հանդես են եկել հարցազրույցներով, որոնցից պարզ է դառնում, որ դեռևս որևէ պատգամավոր առայժմ չի պատրաստվում նախաձեռնել Նիկոլ Փաշինյանի անվստահություն հայտնելու գործընթաց։
2025 թվականի մայիսի 3-ի, ժամը 08։00-ի դրությամբ Նիկոլ Փաշինյանը շարունակում է վայելել ՀՀ Ազգային ժողովի բոլոր 107 պատգամավորների անվերապահ և ամբողջական վստահությունը։
Սա չի փոխում պայքարի մեր տրամադրությունը։ Ես առավել քան վստահ եմ, որ Նիկոլ Փաշինյանը հեռացվելու է անվստահության միջոցով, որովհետև, իմ խորին համոզմամբ դա հայ ժողովրդի ցանկություն է։
Ընդամենն առաջարկել ենք Ազգային ժողովի պատգամավորներին` կատարել ժողովրդին տված իրենց խոստումները և Սահմանադրությամբ սահմանված` իրենց պարտականությունները…
Էլ թիրախավորել, էլ շանտաժ, էլ անհասկանալի նախապայմաններ,… էլ ինչ ասես։
Մենք շարունակելու ենք մեր հետևողական պայքարը, որովհետև դա ազնիվ է, օրինական և տրամաբանական։ Այդ պայքարի գլխավոր շահառուները հենց նրանք են, ովքեր այս փուլում իրենք են փորձում դիմադրություն ցույց տալ։ Բայց դա իրենց չի հաջողվի, որովհետև անվստահության գաղափարը պահանջված է, արդիական և ամեն օր ստանալու է առավել մեծ հանրային աջակցություն։
Էդգար Ղազարյան, ՀՀ պետական, հասարակական գործիչ, դիվանագետ, գիտնական
