Սոցիոլոգիական հարցումները ցույց են տալիս, որ երևանցիների 85 տոկոսը դեմ է հանրային տրանսպորտի սակագնի կտրուկ թանկացմանը, այսօր լրագրողների հետ զրույցում ասաց «Հայաքվե» նախաձեռնության համակարգող Ավետիք Չալաբյանը։
«Հատուկ ուզում եմ նշել «կտրուկ» բառը. եռապատիկ թանկացում է տեղի ունենում։ Մենք հետազոտություն էինք կատարել, որը ցույց էր տալիս՝ դրանից հետո Երևանը դառնալու է տարածաշրջանում ամենթանկ հանրային տրանսպորտ ունեցող մայրաքաղաքը։ Ավելի թանկ է միայն Արևմտյան Եվրոպայի երկրներում, որտեղ կենսամակարդակը 5 անգամ բարձր է, քան մեզ մոտ։
Մարդիկ գուցեև կասկածում են բոյկոտ անեն, թե ոչ, բայց մեր կոչը և հանձնառությունն են նյութապես աջակցել բոյկոտ իրականացնող մեր քաղաքացիներին։ Փետրվարի 1-ին շատ քիչ ժամանակ է մնացել, այդ օրը կտեսնենք իրական հանրային արձագանքը»,- ասաց նա՝ կրկին հորդորելով բոյկոտել հանրային տրանսպորտի թանկացման դեմ։
Չալաբյանը միաժամանակ հավելեց՝ իրենք չեն ասում, որ տրանսպորտը երբևէ չպետք է թանկանա, սակայն որևէ հիմք չկա ուղետոմսը թանկացնել միանգամից եռակի անգամ։
«Անցած տարի գրանցվել է 0,5 տոկոս գնաճ։ Այդ պայմաններում տրանսպորտի 200 տոկոս թանկացում չի կարող լինել»,- ասաց նա։
Լրագրողի դիտարկմանը, որ ըստ իշխանությունների՝ վերգետնյա տրանսպորտից օրական 400 հազար մարդ է օգտվում, սակայն անգամ իրականացված «բարեփոխումների» պայմաններում օրական 20 միլիոն դրամից ավելի քաղաքային բյուջե չի մուտքագրվում, ուրեմն ինչպե՞ս են քաղաքային իշխանությունները ուռետոմսի թանկանալու դեպքում պայքարելու ստվերի դեմ, Չալաբյանը պատասխանեց.
«Կարծում եմ՝ թանկանալու դեպքում ստվերը կմեծանա, որովհետև է՛լ ավելի մեծ թվով քաղաքացիներ հակված կլինեն չվճարելու»։
