Արցախի Մարտունու շրջանի զինվորական հոսպիտալն օրերս փակվել է, եւ աշխատակիցներին որեւէ բացատրություն չի տրվել, թե ինչու է այդպես արվում: Այս մասին NEWS.am-ի հետ զրույցում նշեց Արցախի ԱԺ «Արդարություն» խմբակցության պատգամավոր Մետաքսե Հակոբյանը:
«Արդեն երկար ժամանակ է, որ սուսիկ-փուսիկ բավականին մեծ կրճատումներ սկսեցին նախ բանակի սպայական կազմի մեջ, հետո նաեւ ավելի ցածր կազմի մեջ, հիմա անցել են բուժհաստատություններին: Նույն վիճակում է նաեւ Ստեփանակերտի հոսպիտալը:
Ստեփանակերտի հոսպիտալում կրճատումներ են անում եւ արդեն զգացվում է, որ այդպիսի գործընթաց կա, քչացրել են հիվանդների քանակը: Ինչ-որ գործընթացներ են անում, որից ակնհայտ երեւում է, որ տանում են ապառազմականացման: Այդ առումով մենք արդեն որոշակի անելիքներ ունենք պլանավորած, չեմ ուզում առաջ ընկնել, սկսելու ժամանակ կասենք»,-ասաց նա:
Պատգամավորը հավելեց, որ Մարտունու շրջանի զինվորական հոսպիտալը կցել են մի այնպիսի տարածքի, որը տասնյակ կմ-ներով հեռու է. «Կամ կանխամտածված է այսպիսի բան անում, կամ տգետ են, որովհետեւ ինչպե՞ս կարող են ռազմական գործողությունների ժամանակ կարողանալու զինվորին արագ բուժօգնություն ցուցաբերել: Մոռանում են, որ մենք անընդհատ պատերազմական իրավիճակում ենք, ամեն պահի այդ վտանգը մեր գլխին կախված է: Ես կարոող եմ ենթադրել, որ ուժեղ ճնշման արդյունքում է սա կատարվում, ինչպես Փաշինյանն է ասում՝ միջազգային հանրությունն է ճնշում: Ճնշում են իրեն, ինքը ճնշում է այստեղի իշխանություններին, այստեղի իշխանություններն էլ անում են այն, ինչ իրենից պահանջում են: Ես ենթադրում եմ, որ սա Փաշինյանի հրահանգով է, իրեն էլ հրահանգել է Ադրբեջանը, միջազգային հանրությունը»,-ընդգծեց ընդդիմադիր պատգամավորը:
Հիշեցնենք, որ կառավարության վերջին նիստում ՀՀ վարչապետ Նիկոլ Փաշինյան ասաց, թե «Սոչիում Ռուսաստանի եւ Ադրբեջանի ղեկավարներին ներկայացրել է Ղարաբաղի իշխանությունների առաջարկը, որ եթե Արցախի շուրջ ստեղծվի ապառազմականացված գոտի՝ միջազգային երաշխիքներով, ապա նման մասշտաբի Պաշտպանության բանակ ունենալու կարիք Ղարաբաղը կարող է եւ չունենալ»։
news.am
