Առնվազն 24 մարդ է զոհվել Կալիֆոռնիայի Լոս Անջելես շրջանը պատուհասած հրդեհի հետևանքով։
Fox News հեռուստաալիքը հայտնում է՝ զոհերի մեծ մասի ինքնությունը դեռ պարզված չէ։ Ավելի վաղ հաղորդվում էր, որ զոհվել է 16 մարդ, եւս 13-ը անհետ կորել է։
Կալիֆոռնիայի արտակարգ իրավիճակների ծառայության աշխատակիցները զգուշացնում են, որ այս շաբաթվա սկզբին Լոս Անջելեսում քամիները կարող են ուժեղանալ, ինչը կնպաստի անտառային հրդեհների արագ տարածմանը: Ամենասարսափելի հրդեհը, որը տեղի է ունեցել Խաղաղ օվկիանոսի Պալիսադես շրջանում, սպառնում է Բրենթվուդին և Բել Էյրին, այն տարածքին, որտեղ շատ ամերիկացի աստղեր առանձնատներ ունեն:
Հունվարի 7-ին սկսված հրդեհը շուրջ 180 հազար մարդու տարհանման, մոտավորապես 10 հազար շենքի ավերվելու պատճառ է դարձել։
Հրդեհների հետևանքով հոլիվուդյան մի քանի աստղեր արդեն կորցրել են իրենց տները , այդ թվում՝ Էնթոնի Հոփքինսը, Փերիս Հիլթոնը, Բիլի Քրիսթալը և Մել Գիբսոնը։
Տեղի հրշեջներին օգնում են ութ այլ նահանգների անձնակազմեր, ինչպես նաև հրշեջներ Կանադայից և Մեքսիկայից:
Արտակարգ իրավիճակների ծառայությունները բացատրում են, որ երբ խոսքը վերաբերում է «հրդեհը հսկողության տակ առնելու», չի նշանակում, որ հրդեհը մարվել է։ «Դժբախտաբար, այս պահից մինչև չորեքշաբթի մենք վերադառնում ենք «կարմիր դրոշի» պայմաններին՝ աղետալի քամու պոռթկումների պոտենցիալով. ակնկալվում է, որ քամիների ուժգնությունը առավելագույնի կհասնի երեքշաբթի», – BBC-ին ասել է Փասադենայի հրշեջների ղեկավար Չադ Օգուստինը:
«Թեև մենք որոշակի առաջընթաց ունենք, բայց վերջը դեռ մոտ չէ»,- ընդգծել է նա։
Կալիֆորնիայի հրշեջ ծառայության ներկայացուցիչ Թոդ Հոփքինսը կիրակի ասել է, որ Խաղաղ օվկիանոսի Պալիսադեսում բռնկված հրդեհը ոչնչացրել է մոտ 90 քառակուսի կմ տարածք և սպառնում է հասնել Բրենթվուդ:
Այստեղ են ապրում հոլիվուդյան բազմաթիվ հայտնի աստղեր, այդ թվում՝ Առնոլդ Շվարցենեգերը և Ռիզ Ուիզերսփունը: Այնտեղ են ապրել նաև դերասանուհի Մերիլին Մոնրոն և ամերիկացի ֆուտբոլիստ ՕՋ Սիմփսոնը։
Բացի այդ, Բրենթվուդում է գտնվում Getty ցուցահանդեսային կենտրոնը, որտեղ պահվում են արվեստի անգին գործեր, այդ թվում՝ Ռեմբրանդտի և Վան Գոգի կտավները։
Հրդեհը սպառնում է տարածվել դեպի խիտ բնակեցված Սան Ֆերնանդո հովիտը, որտեղ ապրում է մոտ 1,8 միլիոն մարդ։
Լոս Անջելեսի շերիֆ Ռոբերտ Լունան կիրակի ասել է, որ քաղաքի 105.000 բնակիչների տարհանման հրաման է տրվել, ևս 87.000-ին նախազգուշացվել է, որ կարող են տարհանվել: Նախկինում հաղորդվում էր, որ 153 հազար մարդ ենթակա է անհապաղ տարհանման, եւս 166 հազարը նախազգուշացում է ստացել։
