Ոչ ոք չի ցանկանում, որ Հայաստանը դուրս գա Եվրասիական տնտեսական միությունից, այդ թվում՝ նման հայտարարություններ է անում նաև երկրի ղեկավարությունը։ Այս մասին «Вести» լրատվական ծառայությանը տված հարցազրույցում հայտարարել է Ռուսաստանի փոխվարչապետ Ալեքսեյ Օվերչուկը՝ պատասխանել է այն հարցին՝ արդյոք Հայաստանը դուրս է գալիս Անկախ պետությունների համագործակցությունից կամ Եվրասիական տնտեսական միությունից։
«Գիտեք, իրավիճակը բավական տարօրինակ և ոչ ստանդարտ է, որովհետև ոչ ոք չի ցանկանում, որ ՀՀ-ն դուրս գա ԵԱՏՄ-ից, և հենց ՀՀ-ի ղեկավարությունն էլ հայտարարում է, որ չի ցանկանում դուրս գալ ԵԱՏՄ-ից»,- նշել է Օվերչուկը։
Ալեքսեյ Օվերչուկի խոսքով, ՀՀ վարչապետ Նիկոլ Փաշինյանի՝ Ղազախստանում կայանալիք ԵԱՏՄ գագաթնաժողովին չմասնակցելու որոշումը հստակ ազդանշան է այն մասին, թե ինչպես է ՀՀ կառավարության ղեկավարը սահմանում իր առաջնահերթությունները։
«Այն փաստը, որ նա այնտեղ չի լինի, արդեն իսկ հստակ ազդանշան է այն մասին, թե ինչպես է նա սահմանում իր առաջնահերթությունները», – ասել է Օվերչուկը՝ պատասխանելով «ՌԻԱ Նովոստիի» հարցին՝ ԵԱՏՄ առաջիկա գագաթնաժողովում Փաշինյանի բացակայության մասին։
