Հայտարարություններն այն մասին, թե Հավաքական անվտանգության պայմանագրի կազմակերպությունը (ՀԱՊԿ) Երեւանին փորձանքի մեջ է թողել Հայաստանի եւ Ադրբեջանի միջեւ հակամարտությունում, չեն համապատասխանում իրականությանը։ Այս մասին այսօր՝ մարտի 2-ին, ասել է Ռուսաստանի արտաքին գործերի նախարար Սերգեյ Լավրովը Անթալիայի դիվանագիտական ֆորումից հետո հրավիրված մամուլի ասուլիսում, տեղեկացնում է ՏԱՍՍ-ը։
Ափսոսում ենք, որ ՀՀ ղեկավարությունը, ըստ ամենայնի, գիտակցված որոշում է կայացրել վարել ՌԴ-ի հետ հարաբերությունների հետեւողական վատացման, Լեռնային Ղարաբաղում տեղի ունեցած ամեն ինչում Ռուսաստանին մեղադրելու գիծ, ասել է Ռուսաստանի արտաքին գործերի նախարար Սերգեյ Լավրովը։
«Դա, իհարկե, հարիր չէ դաշնակցային հարաբերություններին։ Գլխավոր մեղադրանքներից մեկն այն է, որ բացի այն արտահայտություններից, որոնք ես մեջբերեցի, երբ հայ պաշտոնատար անձինք հայտարարում են, որ հենց Ռուսաստանն է Ադրբեջանին դրդել պատերազմ սկսել, ինչպես նրանք ասում են, 2020թ. սեպտեմբերին։ Դրանք անշնորհակալ գնահատականներ են, որովհետեւ հենց ՌԴ-ն կանգնեցրեց այդ պատերազմը, ընդ որում՝ այն կարող էր կանգնեցնել շատ ավելի շուտ, երբ ադրբեջանցիները դեռ չէին վերցրել Շուշին, բայց երբ Նիկոլ Վավոաեւիչ Փաշինյանը, ի պատասխան Վլադիմիր Պուտինի կոչերի, ասաց. «Ոչ, մենք մինչեւ վերջ կկռվենք», դե խնդրեմ։ Թեեւ կարելի էր, էլի եմ ասում, կանգ առնել ավելի շուտ, եւ այնտեղ տարբերակներ կային, որոնք թույլ էին տալիս ադրբեջանցի փախստականներին վերադառնալ Շուշի՝ Շուշին պահպանելով Ղարաբաղի կազմում։ Դե, դա արդեն անցած էտապ է»,- ասել է Լավրովը։
Ռուսաստանը հուսով է Հայաստանից պատասխան ստանալ համատեղ ինտեգրացիոն կառույցներին մասնակցության պարտավորությունների կատարման մասին, ներառյալ Հավաքական անվտանգության պայմանագրի կազմակերությանը (ՀԱՊԿ), ասել է Սերգեյ Լավրովը։
«Մենք շատ կցանկանայինք, որպեսզի մեր հայ գործընկերները կողմնորոշվեին, թե ինչպես են ցանկանում այսուհետ ապրել եւ ինչպես են ցանկանում փոխադարձ հիմքով կատարել այն պայմանավորվածությունները, որոնք կապում են մեզ ամենատարբեր ինտեգրացիոն կառույցներում (ներառյալ ՀԱՊԿ-ն)»,- ասել է Ռուսաստանի արտաքին գործերի նախարար Սերգեյ Լավրովը։
«Հայտարարությունն այն մասին, թե ՀԱՊԿ-ն Հայաստանին թողեց փորձանքի մեջ, նույնպես չի համապատասխանում իրականությանը։ Երբ ՀԱՊԿ-ն, ի պատասխան Երեւանի խնդրանքի, փորձագետների իր առաքելությունն ուղարկեց՝ տեղում ուսումնասիրելու համար, նա վերադարձավ եւ առաջարկեց հայկական տարածքում Ադրբեջանի սահմանին դիտորդների խաղաղապահ առաքելություն տեղակայել»- ասել է Ռուսաստանի արտաքին գործերի նախարար Սերգեյ Լավրովը։
