«Հայաստան» հիմնադրամի տնօրենի հրամանով ազատվել եմ աշխատանքից՝ ցույցերին մասնակցելու պատճառով. Աննա Մանուկյան

7

Աննա Մանուկյանը «Հայաստան» համահայկական հիմնադրամի տնօրենի հրամանով ազատվել է աշխատանքից «Դիմադրության»  շարժման ցույցերին (աշխատանքային ժամերից հետո) մասնակցելու պատճառով։ Այս մասին ֆեյսբուքյան գրառմամբ հայտնում է հենց Աննա Մանուկյանը։ 

Նա գրել է. 

«Սիրելի ընկերներ, երեկ «Հայաստան» Համահայկական Հիմնադրամում իմ աշխատանքային վերջին օրն էր։ 2012թ-ից պատիվ եմ ունեցել աշխատելու այս բացառիկ կառույցում, որը 30 տարի շարունակ շենացրել է Հայաստանն ու Արցախը: Աշխատել եմ հրաշալի մարդանց հետ, ձեռք եմ բերել լավ ընկերներ և մի փոքր մասնիկ կազմել բազմաթիվ մեծ ու փոքր ծրագրերի իրագործման։

Երեկ Հիմնադրամի տնօրենի հրամանով ազատվել եմ աշխատանքից՝ «Դիմադրության»  շարժման ցույցերին (աշխատանքային ժամերից հետո) մասնակցելու պատճառով։ Իմ սիրելի այս կառույցը ապաքաղաքական էր մինչև 2018թ, երբ դեռ այս կապիտուլյանտ իշխանությունները չէին սկսել հիմնահատակ քանդել ազգայինը բովանդակող ամեն ինչ, և առաջին քայլերը սկսեցին հենց Հիմնադրամից, երբ գործ կարեցին մեր երկարամյա սիրելի տնօրեն Արա Վարդանյանի դեմ:
Կվերադառնամ իմ շատ սիրելի Հիմնադրամ, երբ այնտեղ «ժամանակավոր հյուրեր» այլևս չեն լինի։ Հիմնադրամը միշտ լինելու և ծաղկելու է։

Իմ սկզբունքները վեր են ամեն ինչից, աշխատանք կորցնելը շատ փոքր խնդիր է, երբ կանգնած ենք ՀԱՅՐԵՆԻՔԸ կորցնելու վտանգի առաջ։ Ես իմ տեղում և իմ կարողությունների չափով ամեն օր, ամեն րոպե պայքարելու եմ թրքահպատակության դեմ, մի ամբողջ լուսավոր սերունդ Եռաբլուրում տեղավորածի դեմ, նրանցից մի քանիսի մարմինները ամիսներով պարկերով նկուղներում պահող արհավիրքի դեմ, Արցախի 70%-ը հանձնած և մնացածը հանձնել պատրաստվողի դեմ, Ցեղասպանությունը մոռացողի դեմ, իր սեփական ազգին ատողի դեմ, Արցախի դրոշից սարսափողի դեմ։ Խնդրում եմ այս հողն ու ջուրը սիրող բոլոր հայրենասեր մարդկանց միանալ շարժմանը»։ 

Panorama.am-ը դիմեց «Հայաստան» համահայկական հիմնադրամին՝ արդյո՞ք ծանոթ են իրենց արդեն նախկին աշխատակից Աննա Մանուկյանի գրառմանը։ 

«Հայաստան» հիմնադրամից պատասխանեցին. «Տեղեկացնում ենք, որ «Հայաստան» համահայկական հիմնադրամի նախկին աշխատակից Աննա Մանուկյանի հետ աշխատանքային պայմանագիրը լուծվել է աշխատանքային կարգապահությունը պարբերաբար խախտելու համար՝ համաձայն ՀՀ Աշխատանքային օրենսգրքի 113-րդ հոդվածի 1-ին մասի 5-րդ կետի և 121-րդ հոդվածի 1-ին մասի։

Միևնույն ժամանակ հայտնում ենք, որ «Հայաստան» համահայկական հիմնադրամը համազգային նշանակության, ապաքաղաքական կառույց է։ Հիմնադրամի հեղինակությունն ու բարի համբավն արատավորող ցանկացած ապատեղեկատվություն հարվածի տակ է դնում Հիմնադրամի գործունեության արդյունավետությունը»։

Նայենք հոդվածները՝
ՀՀ Աշխատանքային օրենսգրքի 113-րդ հոդվածի 1-ին մասի 5-րդ կետ. «
Աշխատանքային պայմանագրի լուծումը գործատուի նախաձեռնությամբ՝  աշխատողի կողմից աշխատանքային պայմանագրով կամ ներքին կարգապահական կանոններով իրեն վերապահված պարտականությունները առանց հարգելի պատճառի պարբերաբար չկատարելու դեպքում։»

ՀՀ Աշխատանքային օրենսգրքի 121-րդ հոդվածի 1-ին մասի. «Գործատուն իրավունք ունի սույն օրենսգրքի 113-րդ հոդվածի 1-ին մասի 5-րդ կետով նախատեսված հիմքով լուծելու աշխատանքային պայմանագիրը, եթե մինչև տվյալ աշխատանքային կարգապահական խախտումը աշխատանքային կարգապահական խախտում թույլ տված աշխատողն ունի առնվազն երկու չհանված կամ չմարված կարգապահական տույժ»։

Դե, սկզբունքորեն հիմնադրամը հաստատել է գրառումը՝ հնարավոր չէ համ գնալ ցույցերի, համ առնվազն երկու անգամ չբացակայել  աշխատավայրից։

Panorama.am