«Հայաստանի հեռուստատեսային և ռադիոհաղորդիչ ցանց» ՓԲԸ տնօրեն Մուշեղ Միլիտոնյանն աշխատանքից ազատման դիմում է ներկայացրել. տեղեկությունը նա հրապարակել է իր էջում։
Նշենք, որ Մուշեղ Միլիտոնյանը «Հայաստանի հեռուստատեսային և ռադիոհաղորդիչ ցանց» ընկերության տնօրենի պաշտոնը զբաղեցրել է շուրջ 5 տարի՝ սկսած 2019 թվականից: Նա Գրողների միության նախագահ Էդվարդ Միլիտոնյանի որդին է:
Նշենք, որ այսօր առավոտյան հայտնի դարձավ, որ «Հայաստանի հեռուստատեսային և ռադիոհաղորդիչ ցանց» (ՀՀՌՑ) ՓԲԸ-ն արգելափակել է հանրային մուլտիպլեքսով սփռվող «ՌՏՌ-Պլանետա» հեռուստաալիքով հեռարձակվող «Երեկոն Վլադիմիր Սոլովյովի հետ» և «Կիրակի երեկոն Վլադիմիր Սոլովյովի հետ» հեղինակային հաղորդումների հեռարձակումը Հայաստանի Հանրապետության տարածքում: Տեղեկությունը հայտնում է ՀՀՌՑ–ն։
Նշվում է, որ նման որոշման համար հիմք է հանդիսացել «Հայաստանի Հանրապետության կառավարության և Ռուսաստանի Դաշնության կառավարության միջև զանգվածային հեռահաղորդակցության ոլորտում համագործակցության մասին» համաձայնագրի 5-րդ և 6-րդ հոդվածների՝ Հեռուստատեսության և ռադիոյի հանձնաժողովի կողմից վերջին շրջանում արձանագրված շարունակական խախտումների փաստը։
Կարո՞ղ ենք ենթադրել, որ ՀՀՌՑ-ի այս հայտարարությունն ու ընկերության տնօրենի աշխատանքից ազատվելն իրար հետ կապ ունեն։
