Օպերային երգչուհի, երգահան, միջազգային մրցույթների դափնեկիր Մայա Աֆրիկյանը 2020-ին պատվով ներկայացրել է Հայաստանը մի շարք միջազգային մրցույթներում և մրցանակների արժանացել:
Կկորոնավիրուսով պայմանավորված` բոլոր մրցույթներն անցկացվել են համացանցի միջոցով։ Երգչուհին 13 միջազգային մրցույթի դափնեկիր է, որոնց մեծամասամբ մասնակցել է որպես հեղինակ-կատարող։ «Այս տարի դեկտեմբեր ամսին հեռավար կարգով մասնակցեցի 3 մրցույթի, որտեղ կրկին հաղթանակներ գրանցեցի։ Երկու առաջին դափնի և մեկ Գրան պրի։ Միջազգային «Սթար Ֆեստ» մրցույթին իմ տեսաձայնագրությամբ ներկայացրել էի Միխայիլ Գուցերիևի խոսքերի հիման վրա գրված իմ հեղինակային «Я не люблю зимой грозу» երգը։ Ինձ նվագակցում էր փայլուն դաշնակահարուհի, միջազգային մրցույթների դափնեկիր Լիլիանա Դարբինյանը»,-նշում է Աֆրիկյանն ու հավելում, որ մրցույթում «Հեղինակային երգ» անվանակարգում արժանացել է առաջին կարգի դափնեկրի դիպլոմի:
Նրա խոսքով՝նա իր բոլոր հաղթանակները նվիրում է հայ զինվորներին:
«Я не люблю зимой грозу» երգի տեսաձայնագրությամբ երգչուհին նաև մասնակցել է իտալական The Song միջազգային երաժշտական մրցույթին այս անգամ որպես երգչուհի։ «Ակադեմիական վոկալ» անվանակարգում կրկին արժանացել է առաջին մրցանակին։ Երկու առաջին մրցանակին հաջորդել է Գրան պրի՝ երգչուհին «В вихре Велесова круга» մրցույթ-փառատոնին ներկայացել է տաղանդաշատ երգահան Արմինե Հարությունյանի երգով, որի բառերի հեղինակը Միխայիլ Գուցերիևն է։ Այս մրցույթում «Ակադեմիական վոկալ» անվանակարգում արժանացել է Գրան պրիի։
