Գյումրու Յոթվերք եկեղեցում Փաշինյանի համար անցկացված պատարագն անցնցում չի եղել։
Գյումրեցիներն իրենց վրդովմունքն են հայտնել. «Սա կոչվում է Յոթվերքի բռնազավթում։ Շիրակի թեմի 29 հոգևորականները մերժել են Փաշինյանի համար պատարագ անել՝ զեղչելով Ամենայն հայոց կաթողիկոսի ու մեր կալանավորված առաջնորդի՝ Միքայել Սրբազանի անունները, դրա համա՞ր են իրենց հետ քահանա բերել։ Մարդկանց չեն թողնում մտնել եկեղեցի, Յոթվերքը շրջապատված է ոստիկաններով, մուտքերը փակել են։ Այսպիսի բան նույնիսկ 37 թվին չի եղել»։
Վաղ առավոտից Գյումրու Վարդանանց հրապարակում խիստ հսկողություն էր իրականացվում։ Շաբաթ երեկոյան եկեղեցու բոլոր քահանաները դուրս են եկել։ Յոթվերքն ամբողջությամբ ստուգվել է, «խուզարկվել», դուռը կնքվել է։ ԱԱԾ-ն ամբողջ ընթացքում եկեղեցում է եղել։
Այսօրվա պատարագին Փաշինյանն իր հետ բերել էր իր կողմն անցած սրբազաններից 4-ին՝ Նավասրադ Կճոյանին, Գևորգ Սարոյանին, Վազգեն Միրզախանյանին և Սիոն Ադամյանին։ Հենց Արմավիրի թեմից էլ, որի առաջնորդն է Սիոն Ադամյանը, բերվել էր Մկրտիչ Մուշադյան քահանան, որն էլ Փաշինյանի համար պատարագ արեց՝ զեղչելով կաթողիկոսի ու Միքայել Սրբազանի անունները։
Սակայն պատարագի ժամանակ գյումրեցի մի աղջիկ գոչեց կաթողիկոսի ու Միքայել Սրբազանի անունները, իսկ երգչախմբի կողքին կանգնած աղջիկների խումբը բարձրաձայն երգելով նշեց նրանց անունները։
Փաշինյանի հետ Գյումրի գնացած Ալեն Սիմոնյանը հայտարարել է՝ ժամանակն է, որ հաջորդ պատարագը լինի Մայր Աթոռում։
Հիշեցնենք, որ այսօր 1988 թվականի աղետալի երկրաշարժի 37-րդ տարելիցն է։
Նշենք, որ Փաշինյանը բացահայտ հայտարարել է՝ ինքը գնում է պատարագի այնտեղ, որտեղ չի հնչում կաթողիկոսի անունը։ Նա նաև խոստովանել է, որ իր անունից «խնդրում են» քահանաներին, որ պատարագին Վեհափառի անունը զեղչեն։ Իսկ «խնդրողները» կարող են լինել նաև ԱԱԾ-ից։
Նաև նշենք, որ Փաշինյանը գնացել էր Գյումրի, որի ղեկավարը և հոգևոր առաջնորդը կալանավորված են։
Տեսանյութը՝ այստեղ։
Հետևեք մեզ նաև Տելեգրամում։
