Ադրբեջանի նախագահի աշխատակազմն Արցախի ներկայացուցիչներին առաջարկել է «որպես մարտի 1-ի հանդիպման և մարտի 13-ի հրավերի շարունակություն՝ հանդիպել Բաքվում»:
«Որպես մարտի 1-ին կայացած հանդիպման և մարտի 13-ին ներկայացված հրավերի շարունակություն, Ադրբեջանի նախագահի աշխատակազմը ևս մեկ անգամ առաջարկում է հանդիպում անցկացնել Բաքվում ապրիլի առաջին շաբաթվա ընթացքում՝ քննարկելու վերաինտեգրումը, ինչպես նաև Ղարաբաղում ենթակառուցվածքային ծրագրերի իրականացման հարցը»,- նշվում է Ադրբեջանի նախագահի աշխատակազմի տարածած տեղեկատվության մեջ։
Հիշեցնենք, որ Արցախի և Ադրբեջանի ներկայացուցիչների նախորդ հանդիպումը ռուս խաղաղապահների հրամանատարության մասնակցությամբ տեղի էր ունեցել փետրվարի 24-ին։ Կողմերը հանդիպել էին նաև մեկ շաբաթ անց՝ մարտի 1-ին Իվանյանում (նախկին Խոջալու)։ Քննարկվել էր Լաչինի միջանցքի ապաշրջափակման հարցը, էլեկտրաէներգիայի և գազի մատակարարման խնդիրները, ինչպես նաև Բաքվի ներկայացուցիչների կողմից Դրմբոնի և Կաշենի հանքավայրերում բնապահպանական մոնիթորինգի հնարավորությունը։ Հանդիպումներից հետո Արցախի նախագահ Արայիկ Հարությունյանը բացառել էր Ադրբեջանի հետ ինտեգրացիոն որևէ գործընթաց:
«Սակայն դա չի նշանակում, որ մենք խուսափելու ենք շփումներից՝ ենթակառուցվածքային և հումանիտար բնույթի խնդիրներ լուծելու համար»,- ասել էր Արցախի Հանրապետության նախագահը:
Այնուհետև Ալիևի աշխատակազմն Արցախի ներկայացուցիչներին առաջարկել էր հանդիպել Բաքվում, սակայն առաջարկը մերժվել էր:
