Մենք նկատում ենք, որ որքան մոտենում է Բաքվում Կլիմայի փոփոխության (COP29)համաժողովի օրը, միջազգային դաշտում որոշակի ակտիվություն է նկատվում հայ գերիների վերադարձի պահանջի հարցով։ ԵԽ-ում ևս պլանավորվում է այս թեմաներով քննարկում իրականացնել, Ադրբեջանում ապօրինաբար պահվող հայ ռազմագերիների և պատանդների անհապաղ ազատ արձակման պահանջով ակցիայի ժամանակ լրագրողների հետ զրույցում այսօր ասաց Արցախի ՄԻՊ Գեղամ Ստեփանյանը։
Նրա խոսքով՝ այս օրերին, երբ Ադրբեջանի վրա սևեռված է աշխարհը, պետք է պարտադրել Ադրբեջանին կատարել մարդու իրավունքների միջազգային դրույթները։
«Պահանջը պետք է ներկայացվի հնարավորինս մեծ ճնշումներ գեներացնելու համար»,-ասաց Գեղամ Ստեփանյանը։
Արցածի ՄԻՊ-ը միաժամանակ տեղեկացրեց, որ նախատեսում են ակցիաներ իրականացնել ոչ միայն ՄԱԿ-ի հայաստանյան գրասենյակի առաջ, այլ նաև ՀՀ ԱԳՆ-ի, ՀՀ-ում Ռուսաստանի Դաշնության, Ֆրանսիական Հանրապետության և Ամերիկայի Միացյալ Նահանգների դեսպանատների առաջ, որոնց ընթացքում նույն պահանջով նամակներ են փոխանցվելու հասցեատերերին։
Գեղամ Ստեփանյանի համոզմամբ՝ այս կարևոր հարցի մասին չի կարելի լռել, պետք է ամեն օր խոսել, աշխարհին պատմել, քանի որ խոսքը մարդկային ճակատագրերի մասին է։
«Մենք տեսել ենք, որ Մերձավորարևելյան հակամարտության պարագայում ՄԱԿ-ի գլխավոր քարտուղարը հանդես է եկել պատանդներին ազատ արձակելու կոչով և հստակ պահանջով։ Նույնը պետք է լի նի նաև հայ գերիների մասով»,-ասաց Ստեփանյանը՝ շեշտելով, որ ունենալով գերիներ և անհետ կորածների չճշտված ճակատագրեր՝ պաշտոնական Երևանի՝ Բաքվում կայանալիք միջոցառմանը մասնակցելն ուղղակի անընդունելի կլինի։
Նշենք, որ նախաձեռնությանը միացել են ԱՀ մարդու իրավունքների պաշտոնաթող պաշտպաններ Յուրի Հայրապետյանը, Ռուբեն Մելիքյանը, Արտակ Բեգլարյանը, ինչպես նաև ՀՀ մարդու իրավունքների պաշտոնաթող պաշտպաններ Արման Թաթոյանը և Լարիսա Ալավերդյանը։
