ՀՀ գլխավոր դատախազի տեղակալ, ՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգայանի գործով մեղադրող դատախազ Գևորգ Բաղդասարյանը հերքում է շրջանառվող լուրերը, թե պաշտոնից ազատման դիմում է գրել։ «Սիլվայր գործով» դատական այսօրվա նիստի ավարտից հետո լրագրողների հետ զրույցում մեկնաբանելով պաշտոնից ազատվելու մասին շրջանառվող լուրերը՝ Բաղդասարյանը նշել է, որ դիմում չի գրել։
«Բաղդասարյանի ու Վարդապետյանի միջև զրույց տեղի ունեցե՞լ է, որպեսզի նա ինքնակամ աշխատանքից ազատման դիմում գրի» հարցին ի պատասխան՝ ՀՀ գլխավոր դատախազի տեղակալն ասաց. «Ոʹչ, ոʹչ»։
Ըստ մամուլում շրջանառվող լուրերի՝ Գեւորգ Բաղդասարյանին հասկացրել են, որ նա, լինելով «բարձրակարգ իրավաբան», ձախողել է Ռոբերտ Քոչարյանի դեմ հարուցված «Մարտի 1»-ի գործով մեղադրանքը, քանի որ ՍԴ-Ն այն հակասահմանադրական է ճանաչել:
Բաղդասարյան-Վարդապետյանի ներքին հակադրությունները սկսվել են սեպտեմբերին:
Նորանշանակ գլխավոր դատախազը ցանկացել է իր տեղակալի պաշտոնին նշանակել ՀՀ քննչական կոմիտեի Երեւանի Քանաքեռ-Զեյթունի քննչական բաժնի նախկին պետ Հակոբ Գեւորգյանին։ Վերջինս դիմում է ներկայացրել որակավորման հանձնաժողով եւ քննություն հանձնել: Սակայն չի հաղթահարել անցողիկ շեմը. Հակոբյանը քննությունից կտրվել է:
Նշված հանձնաժողովի նախագահը եղել է նախկին դատախազ Արթուր Դավթյանի հետ քավորսանիկական կապեր ունեցող Գեւորգ Բաղդասարյանը, որին չի ներվի հանդգնությունը:
Որքան էլ Գեւորգ Բաղդասարյանը հերքի իր մոտալուտ պաշտոնազրկման գործընթացը, դրա ծիլերն արդեն տեսանելի են:
