Նոր ահազանգեր պայթուցիկների մասին. Մետրոպոլիտենի աշխատանքը դադարեցվել է

Վերջին շրջանում հանրային վայրերում պայթուցիկների առկայության մասին ահազանգերը շատացել են: Կարելի է ասել ՝ դրանց հաճախականությունն աննախադեպ է: 

   Օգոստոսի 2-ին, ժամը 18։59-ին Ճգնաժամային կառավարման ազգային կենտրոնը հերթական  տեղեկությունն է ստացել այն մասին, որ Երևանի քաղաքապետարանում, մետրոպոլիտենի բոլոր կայարաններում, Զվարթնոց միջազգային օդանավակայանում, Բաղրամյան 19 հասցեում, ինչպես նաև զինվորական և քաղաքացիական բոլոր կարևորագույն օբյեկտներում պայթուցիկ սարքեր են տեղադրված։

      ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից մեկական մարտական հաշվարկ մեկնել է վերոնշյալ հասցեներ։

    Զվարթնոց միջազգային օդանավակայան է մեկնել նաև Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի կինոլոգիական խումբը, իսկ Բաղրամյան 19 հասցե՝ քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի ինժեներասակրավորական խումբը։

     Մետրոպոլիտենի աշխատանքը ժամանակավորապես դադարեցվել է․ իրականացվել են տեղազննման աշխատանքներ։