Մոսկվայի և Երևանի հարաբերություններն այս փուլում բարդ են. հայտարարել է ՌԴ արտաքին գործերի նախարար Սերգեյ Լավրովը։
Լավրովը հիշեցրել է Ռուսաստանի փոխվարչապետ Ալեքսեյ Օվերչուկի մեկնաբանությունը Հայաստանի՝ Եվրամիությանն անդամակցելու գործընթացի շուրջ քննարկումներ սկսելու վերաբերյալ։
Նա նշել է, որ Հայաստանի անդամակցությունը Եվրամիությանը, ինչին ձգտելու մասին հայտարարել է պաշտոնականմ Երևանը, անհամատեղելի է ԵԱՏՄ-ին միաժամանակյա մասնակցության հետ։
«Քանի որ դրանք երկու տարբեր ազատ առևտրի գոտիներ են, մաքսատուրքերի և մաքսատուրքերի նվազեցման կամ չեղարկման երկու տարբեր համակարգեր, դրանք նույնը լինել չեն կարող»,- ասել է նա։
Հիշեցնենք, որ Ռուսաստանի Դաշնության փոխվարչապետ Ալեքսեյ Օվերչուկն ասել էր՝ Հայաստանի կողմից Եվրամիությանն անդամակցելու գործընթացի մեկնարկը նախատեսող օրինագծի քննարկումը կարելի է համարել որպես Հայաստանի՝ ԵԱՏՄ-ից դուրս գալու սկիզբ։
Մեկնաբանելով Հայաստանի կառավարության որոշումը՝ Օվերչուկը նշել է, որ ԵՄ-ն և ԵԱՏՄ-ն անհամատեղելի են նաև այն պատճառով, որ երկու կազմակերպությունները ենթադրում են մաքսային սահմանների բացակայություն և ապրանքների, ծառայությունների, կապիտալի և աշխատուժի ազատ տեղաշարժ։
Լավրովը հիշեցրել է նաև ՀԱՊԿ առաքելությունից Հայաստանի հրաժարվելու մասին՝ ասելով, որ պաշտոնական Երևանը հրավիրել է Եվրոպական միության առաքելությանը. «Մեր ունեցած տեղեկություններով՝ այս դիտորդներն իրենց շահերն են հետապնդում, ոչ թե Հայաստանի»։
