Ռուսաստանի Անվտանգության խորհրդի փոխնախագահն ասել է, որ Հայաստանում կվռնդեն վարչապետ Նիկոլ Փաշինյանին, եթե այդ երկրում սկսեն գործել եվրոպական գազի գները։
«Իրոք, բոլորի համար պարզ է, որ եթե նրանք անցնեն եվրոպական գազի գներին, Հայաստանում ապրողներն այս մարդուն մեզահոտ փալասներով կքշեն ուղիղ Փարիզ՝ այնտեղ գտնվող իր սիրառատ ընկեր Մակրոնի մոտ», – Max հարթակում գրել է Մեդվեդևը։
Նշենք, որ ՌԴ մի շարք պաշտոնյաներ վերջին օրերին զգուշացնում են ՀՀ իշխանություններին կողմորոշվել՝ ԵԱՏՄ, թե՞ ԵՄ։ Եթե ԵՄ, ուրեմն պետք է պատրաստ լինեն թանկացումներին։ Նրանք միաբերան պնդել են, որ Հայաստանը ռուսական գազը ստանում է եվրոպական շուկայի համեմատ 4 անգամ էժան գնով, իսկ դրանք, ԵԱՏՄ-ից դուրս գալու դեպքում, կարող են հասնել եվրոպական սակագներին՝ ավելի քան 600 դոլար։
Վլադիմիր Պուտինն իր հերթին առաջարկել է Հայաստանում հանրաքվե անցկացնել ԵՄ-ին կամ ԵԱՏՄ-ին միանալու հարցով։
ՌԴ փոխվարչապետ Ալեքսեյ Օվերչուկը, ՌԴ ԱԽ քարտուղար Սերգեյ Շոյգուն, ՌԴ փոխարտգործնախարար Միխայիլ Գալուզինը, Պետդումայի խոսնակ Վյաչեսլավ Վոլոդինն ու այլք, սուր քննադատության են ենթարկում Նիկոլ Փաշինյանին և ՀՀ ներկայիս իշխանություններին՝ Ռուսաստանի նկատմամբ անբարյացկամ գործողությունների համար։
