Axios-ի աղբյուրները հայտնել են, որ Իրանը համաձայնել է մասնակցել բանակցությունների երկրորդ փուլին, սակայն Թեհրանը չի հաստատել այդ տեղեկատվությունը։
Իսլամական հեղափոխության պահապանների կորպուսին կից «Թասնիմ» լրատվական գործակալությունը հաղորդել է, որ Իրանը չի խնդրել երկարաձգել հրադադարը: Խորհրդարանի խոսնակ և Իրանի գլխավոր բանակցող Մոհամմադ Բաղեր Ղալիբաֆի խորհրդական Մահդի Մոհամմադին սոցիալական ցանցերում գրել է, որ Թրամփի խոսքերը փոքր կշիռ ունեն:
«Թրամփի կողմից հրադադարի երկարաձգումը, անկասկած, խորամանկություն է՝ ժամանակ շահելու՝ անակնկալ հարձակման համար», – նրա խոսքերը մեջբերել է Reuters-ը: Մոհամմադին Հորմուզի նեղուցի ամերիկյան շրջափակումը անվանել է շարունակական ռազմական ագրեսիա և հավելել. «Ժամանակն է, որ Իրանը նախաձեռնությունը ստանձնի»:
Իրանի խորհրդարանական Մահմուդ Նաբավիանը, որը Իսլամաբադում բանակցություններին մասնակցող պատվիրակության անդամ էր, Թրամփի՝ հրադադարի երկարաձգման մասին գրառումից հետո X սոցիալական ցանցում գրել է, որ «այսուհետ» ԱՄՆ-ի հետ բանակցությունները «ակնհայտորեն վնասակար և իռացիոնալ են»։ Իրանի բանակի «Խաթամ ալ-Անբիա» կենտրոնական շտաբի խոսնակը զգուշացրել է, որ հարձակման դեպքում իրանական ուժերը «կհարվածեն նախապես որոշված թիրախներին՝ ԱՄՆ-ին և Իսրայելին տալով ևս մեկ, նույնիսկ ավելի դաժան դաս»։
Նաև պարզ չէ՝ Իսրայելը կհամաձայնի՞ հրադադարին, թե՞ կերկարաձգի այն։
BBC News
