Հիմա արդեն պարզվում է, թե ինչո՞ւ էր հինգշաբթի գիշեր Հանրապետության հրապարակը լքված մեր ոստիկանության եւ ազգային անվտանգության ծառայության աշխատակիցների կողմից։ Եթե նույնիսկ կային այդ ծառայողներից մի քանիսը, միեւնույնն է՝ նրանք ոչինչ չարեցին կանխելու, զսպելու, ի հարկին կալանավորելու ազերի խուլիգաններին, որոնք իրենց գրգռիչ՝ «Ղարաբաղ բիզիմդիր» երգ-պառչտուքներով ոչ միայն ազգային ատելություն էին հրահրում, այլ՝ մարդկանց դրդում արժանի ու տեղին քյոթակ տալու այդ խուլիգաններին։
Ոչ ոք չի կարող համոզել մեր քաղաքացիներին, որ դա նախապատրաստված եւ նախածրագրված դավադրություն չէր մեր անվտանգության ծառայությունների կողմից, վերին օղակներում նախապես համաձայնեցված։ Այլապես ազերի խուլիգանները չէին լինի այդքան ինքնավստահ, այդքան լկտի, այդքան ապահով։
Ոչ ոք չի կարող համոզել մեզ, որ այդ պահին հրապարակով անցնող մի քանի հայ տղերք, եթե մոտենային խուլիգան ազերիներին ու տփեին նրանց, ոստիկաններն անմիջապես կձերբակալեին նրանց։ Մանավանդ որ, ազգային անվտանգության ծառայությունը, իր իսկ հաղորդության համաձայն, հետեւել էր հունվարի 3-ից ի վեր Հայաստան մուտք գործած այդ խուլիգաններին։
Եվ հիմա, հենց այս պահին, դատարանի առաջ է կանգնած 70 տարեկան արցախցի գիտական կոչումով մի մարդ, Ղարիբ Բաբայան անունով, որը մեղադրվում է Պարսկաստանից թե որ ջհանդամից եկած ազերի (պարզվում է՝ ատրպատականցի) խուլիգանների խրախճանքը հեռախոսով տեսագրելու եւ տարածելու մեջ։ Մի բան՝ որը կանեինք որեւէ մեկս, եթե տեղում լինեինք։ Առաջադրված մեղադրանքը՝ «ազգային ատելություն սերմանել»։ Գոնե բարձրաձայն մեղադրեն, որ 70 տարեկան հայ մարդը տեսագրել է մեր, այսինքն ազգային ծառայության աշխատանքների անգործությունը, ես կասեի՝ սրիկայությունը։ Իբր պաշտպանում են Իրանի քաղաքացիների խուլիգանության իրավունքը, երբ, ուրբաթ օրն իսկ բարեկամ Իրանի համապատասխան մարմինների կոշտ, արդար դատապարտումը իր ա՛յդ քաղաքացիների դեմ։
Ներքին գործերի նախարարություն, ոստիկանություն, ազգային ծառայություն եւ այլն, այդ ո՞ւմ եք փորձում խաբել։ Իսկ արդարադատությո՞ւն։
Լա՛վ են անում այս պահին դատարանի դիմաց կանգնած քաղաքացիները, իրավաբանները, Բագրատ Սրբազանն ու մյուսները։ Մեր ժողովուրդը ի վերջո ձե՛զ է դատելու Աստուծո վերջին դատարանից առաջ։
ՀԱԿՈԲ ԱՎԵՏԻՔՅԱՆ
Կիրակի, 1։30
Հ.Գ.- Փառք Տիրոջ, Ղարիբ Բաբայանն ազատ արձակվեց։
01.50
