ՀՀ փոխվարչապետ Մհեր Գրիգորյանը կարծում է, որ Հայաստանի և Ադրբեջանի սահմանազատման հանձնաժողովների կանոնակարգի վավերացման գործընթացը սինխրոն է ընթանում:
«Ուղղակի չգիտեմ՝ ո՞ր փուլում է Ադրբեջանում այդ գործընթացը, բայց ստորագրման պահին ստորագրման տրամաբանությունը ենթադրում է, որ սինխրոն պետք է լինի»,-այսօր ԱԺ-ում լրագրողների հետ զրույցում ասաց նա:
Հարցին՝ մտավախություն չունի՞, որ Ադրբեջանը այդ կանոնակարգը չի վարերացնի, նա պատասխանեց. «Ես չունեմ նման մտավախություն: Չեմ կարծում, որ կձգձգեն»:
Ինչ վերաբերում է նրան, որ ապաշրջափակման հարցով եռակողմ հանձնաժողովի նիստերը չեն շարունակվում, փոխվարչապետն ասաց. «Ըստ էության՝ կան ֆունդամենտալ հարցեր, որոնց շուրջ պետք է լինի կոնսենսուս: Մինչև այդ կոնսենսուսը չլինի, դետալների շուրջ քննարկումներ շարունակելն ուղղակի իմաստ չունի»:
Հիշեցնենք, որ այսօր՝ հոկտեմբերի 21-ին ԱԺ արտաքին հարաբերությունների մշտական հանձնաժողովում մեկնարկել է Հայաստանի և Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի և Հայաստանի միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին հարցը:
Հիշեցնենք նաև, որ գործադիրը հավանություն է տվել այդ կանոնակարգին, իսկ ՍԴ-ն այն համարել է Սահմանադրությանը չհակասող՝ նշելով, որ ՀՀ անկախության հռչակագիրը Սահմանադրության մաս չէ։
