ՀՀ նախկին արտգործնախարար Վարդան Օսկանյանը նորից է դիմում ժողովրդին՝ իր առաջարկն ուժի մեջ է, վստահեցնում է, որ Արցախն Ադրբեջանին չհանձնելու այլընտրանք կա, պետք է բանակցությունների ընթացքը փոխել ու օրակարգ բերել Արցախի ինքնորոշման, ինքնավարության իրավունքը:
Օսկանյանն այս հարցը քննարկել է օտարազգի մասնագետների, դիվանագետների հետ, բոլորը միաբերան նույնն են ասում՝ հնարավոր է Արցախը փրկել:
Փաշինյանի ստորագրելուց հետո Բաքու-Ստեփանակերտ երկխոսությունն էլ ինչ իմաստ է ունենալու, դա ժողովրդի աչքերին թոզ փչել է, ձևականություն: Փաշինյանի արածը ոչ միայն անհասկանալի ու անընդունելի է, այլև՝ անիրատեսական. վստահ է Օսկանյանը, որովհետև Արցախն Ադրբեջանին հանձնելուց հետո ոչ մի խաղաղություն չի լինելու, թվում է՝ դա ամենահեշտ ճանապարհն է խաղաղության հասնելու, բայց ոչ, խնդիրները դրանից հետո էլ ավելի են սրվելու: Եթե պատերազմից հետո Փաշինյանի անվտանգությունը կախված է նրա պաշտոնից, ապա Արցախը հանձնելուց հետո նրա անվտանգությունն ու պաշտոնը միաձուլվելու են. երկիրը դառնալու է ոստիկանապետություն. համոզված է Վարդան Օսկանյանը:
Աշխարհում 50-ից ավելի ինքնորոշման շարժում կա, որոնք տասնամյակների պատմություն ունեն և դեռ գործընթացի մեջ են: Աշխարհի ոչ մի ժողովուրդ չի հրաժարվել իր ինքնորոշման իրավունքից: Հայերն առաջինն են լինելու, որ հրաժարվելու են իրենց ինքնորոշման իրավունքից:
Հայաստանի ներքաղաքական անկայունությունն ազդելու է նաև տարածաշրջանի վրա: Այս ամենին կա այլընտրանք. Վարդան Օսկանյանը նորից է առաջարկում՝ համախմբվել: Նա կոչ է անում Նիկոլ Փաշինյանին լսել իրեն, վստահել իրեն ու բանակցությունների ընթացքը փոխելու իր առաջարկն ընդունել, քանի դեռ ուշ չէ:
