Հուլիսի 22-23-ը Շուշիում անց է կացվելու «Նոր մեդիան 4-րդ արդյունաբերական հեղափոխության դարաշրջանում» թեմայով Գլոբալ ֆորում։
Ուշադրություն. որպես պետություն ու ազգ հազիվ 100 տարվա պատմություն ունեցող Ադրբեջանը ֆորումն անց է կացնում իր «ազգային մամուլի 148-ամյակի կապակցությամբ»։
Դե եթե Արցախի Աժ-ի նախագահն իր կոչի մեջ հայտարարում է, թե «Ադրբեջանի հետ հազարամյակներով ապրել են ու էլի կապրեն», իհարկե, Ալիևն էլ կհայտարարի, թե ազգային մամուլ ունեն, ու այն ոչ ավել, ոչ պակաս 148 տարեկան է, իր երկիրն ու ազգին կհամարի բնիկ, հազարամյակների պատմություն ունեցող, իսկ հայերին՝ եկվոր։
Ադրբեջանի նախագահ Իլհամ Ալիևը Շուշիում կհանդիպի ֆորումի մասնակիցների հետ։
Միջոցառմանը կմասնակցեն 150 օտարերկրյա հյուրեր՝ շուրջ 50 երկրներից, այդ թվում՝ 34 երկրների պետական լրատվական գործակալությունների, 12 միջազգային կազմակերպությունների և լրատվական կառույցների ներկայացուցիչներ։ Ֆորումին կմասնակցեն նաև տեղական 60 լրատվամիջոցների ղեկավարներ և ներկայացուցիչներ:
Ադրբեջանական զլմ-ները նշում են, որ Ադրբեջանն իր պատմության մեջ առաջին անգամ մեկ հարթակում հավաքում է աշխարհի առաջատար լրատվամիջոցների, լրագրողական կազմակերպությունների ղեկավարներին, հաղորդակցության ոլորտի ազդեցիկ փորձագետներին, հայտնի լրագրողներին։
Իսկ Շուշիից ընդամենը մի քանի կմ այն կողմ 120 հազար հայ իր Հայրենիքում գերության, պատանդառության մեջ է արդեն 7 ամսից ավելի։ Միջազգային լրատվամիջոցների 150 ներկայացուցչի աչքի առաջ սովամահ է լինում 30 հազար երեխա, հղիները կորցնում են իրենց չծնված երեխային։ 150 լրատավամիջոց ամեն օր բարձրաձայնում է մարդու իրավուքների, ազատ ապրելու, ինքնորոշովելու կեղծ հարցեր, կուրծք է ծեծում կենդանիների պաշտպանության, էկոլոգիական խնդիրների համար, բայց լուռ ու անտարբեր է, խուլ ու կույր է բնաջնջման եզրին կանգնած արցախահայության աղետալի վիճակի հանդեպ։ Ավելին՝ հյուրընկալվում է մարդասպան-ցեղասպան, պատերազմական հանցագործ Ալիևի երկրում։
Լուսանկարում արցախցի հղի կինը թերսնուցումից կորցրել է գիտակցությունը։
Ու սա պատահական հրավեր չէ․ այսկեպ Ալիևը սիրաշահում, կաշառում, իր կողմն է գրավում համաշխարհային զլմներին, որոնք վաղը ավելի մեծ եռանդով ու խանդավառությամբ են պաշտպանելու Ադրբեջանի հայատյաց, ահաբեկչական գործողություններն ու էլ ավելի անտարբեր են լինելու Հայաստանի ու Արցախի նկատմամբ։
Այսպես են երկրի շահն առաջ տանում, ոչ թե երեկոյան ընթրիքին աճեցրած սեփական բանջարեղենով աջապսանդալ են ուտում։
