ՀՅԴ Հայաստանի Երիտասարդական միության անդամներն այսօր Երևան քաղաքի քննչական վարչության կոմիտեի դիմաց բողոքի ակցիա են իրականացնում։ Նրանք պահանջում են դադարեցնել ՀՅԴ-ականների նկատմամբ ապօրինի ձերբակալությունները և ազատ արձակել անազատության մեջ գտնվող իրենց ընկերներին։
«Ձերբակալել են մեր դաշնակցական և երիտասարդական ընկերներին, այն հիմքով, իբր թե նրանց բնակարանների խուզարկության արդյունքում հայտնաբերել են ինչ-որ ահաբեկչության հետ կապ ունեցող իրեր։ Այդ իրերը բոլորը օրինական են, ոչ մի կերպ չեն կարող կապ ունենալ այս անօրինական գործընթացների հետ։ Մենք այդ իրերն օգտագործում ենք մեր Սթրայքբոլ խաղերի համար։
Սիրելի հայրենակիցներ, եթե դուք ձեր տանը ունեք ջրի պիստոլետներ, ամանորյա պայթուցիկներ, հրավառության ինչ-որ նյութեր, դուք ապահովված եք, իսկ եթե դրան զուգահեռ ձեր քաղաքական հայացքները ընդդիմադիր են, դուք մեղադրվում ենք ահաբեկչության նախապատրաստման գործողությունների մեջ։
Մենք բերել ենք այս իրերը ցույց տալու, որ այս իրերից կարելի է գնել ցանկացած զինվորական խանութում։ Կոչ ենք անում իրավական մարմիններին զերծ մնալ այս ապօրինի և ծիծաղ առաջացնող գործընթացներից և անհապաղ բաց թողնել մեր ձերբակալված, հայրենիքի նվիրյալ մեր ընկերներին»,- բարձրախոսով հայտարարեց ակցիայի մասնակիցներից մեկը ։
Այնուհետև դաշնակցական երիտասարդները ՔԿ Երևանի վարչության շենքի առջև նետեցին իրենց հետ բերած իրերը՝ ՀՅԴ-ի կարգախոս «Մահ կամ ազատություն» գրությամբ շապիկներ, «Սթրայքբոլ» խաղի համար նախատեսված խաղալիք զենքեր։
Հիշեցնենք, որ երեկ վաղ առավոտից ուժային կառույցները ներխուժել են մի շարք ՀՅԴ-ականների տներ։ Խուզարկություններ են իրականացվել ՀՅԴ անդամների բնակարաններում, այդ թվում՝ ԱԺ պատգամավոր Գեղամ Մանուկյանի, ՀՅԴ Հայաստանի Գերագույն մարմնի աշխատակազմի ղեկավար Վահագն Մատինյանի, «Եղվարդ» խոշորացված համայնքի ավագանու անդամ, ՀՅԴ Հայաստանի Երիտասարդական միության Կենտրոնական վարչության նախագահ Գևորգ Մուրադյանի։
Ձերբակալվել է յոթ անձ, այդ թվում՝ Գեղամ Մանուկյանի որդին՝ Տարոն Մանուկյանը, ՀՅԴ Երևանի Քաղաքային կոմիտեի անդամ Արսեն Մարտոյանը։ Նրանք մեղադրվում են ահաբեկչության նախապատրաստման մեջ։
